Европэм и къурш нэхъ лъагэ дыдэм дэкIыну загъэхьэзыр
2020-08-08
- Iуащхьэмахуэ лъапэ нобэ къыщыщIэдзауэ шыщхьэуIум и 16 пщIондэ «Эльбрусиада» Iуэхур зэрыщекIуэкIынум теухуа хъыбар зэбгригъэхащ Урысейм АльпинизмэмкIэ и федерацэм.
- Абы хэтынущ Iуащхьэмахуэ и щыгу дэкIыну гупыж зыщIа цIыхуищэм щIигъу. Урысейм АльпинизмэмкIэ и федерацэмрэ альпинизмэмкIэ Евро-Азие зэгухьэныгъэмрэ иджы етхуанэрэ къызэрагъэпэщ Iуэхур траухуащ ТекIуэныгъэ Иныр илъэс 75-рэ зэрырикъум.
- Фестивалыр Iэтауэ къызэIуахынущ шыщхьэуIум и 12-м. Европэм и къурш нэхъ лъагэ дыдэм дэкIыну я мурадщ шыщхьэуIум и 14-м.
- Iуащхьэмахуэ бгыр Хэку зауэшхуэм и зэманым щытащ зауэ щекIуэкIа щыгу нэхъ лъагэ дыдэу. Архивхэм щIэлъ тхыгъэхэр щыхьэт зэрытехъуэмкIэ, мыбдежым щыхэкIуэдащ зауэлI 366-рэ. Кавказым папщIэ зауэ гуащIэхэр екIуэкIащ 1942 гъэм бадзэуэгъуэм и 25-м къыщыщIэдзауэ 1943 гъэм жэпуэгъуэм и 9 пщIондэ. А зэманым къриубыдэу мы щIыналъэм щыхэкIуэдащ цIыху мин 344-рэ, сэлэту, цIыху къызэрыгуэкIыу мин 605-м щIигъум уIэгъэ, фэбжь зэмылIэужьыгъуэхэр ягъуэтат.
- КъБР-м и Iэтащхьэмрэ Правительствэмрэ я пресс-IуэхущIапIэ.