ЩIэныгъэлIхэр мэлажьэ
2020-08-08
- ЩIэныгъэхэмкIэ Дунейпсо Адыгэ Академием и Президиумым и зи чэзу зэIущIэр видеоконференц жыпхъэм иту дыгъуасэ екIуэкIащ. Ар иригъэкIуэкIащ ЩIДАА-м и президентым и къалэнхэр пIалъэкIэ зыгъэзащIэ Къанокъуэ Арсен.
- ЗэIущIэм хэтащ ЩIДАА-м и вице-президентхэу ЛIэужь Iэдэмрэ (Адыгей) ХьэфIыцIэ Мухьэмэдрэ, щIэныгъэ секретарь нэхъыщхьэ Щхьэгъэпсо Сэфарбий, академикхэу Гварамиа Алеко (Абхъаз къэрал университетым и ректор), Сэкий ФатIимэ (Армавир лингвистикэ университетым и ректор), Даур Борис (Шэрджэсхэм я Нэхъыжьхэм я советым и тхьэмадэ), Иуан Зэуал (Къайсэр дэт университетым и егъэджакIуэ), нэгъуэщIхэри.
- Онлайну екIуэкIа зэIущIэм Iуэхугъуитхум щIигъум щыхэплъащ. ЩIэныгъэ секретарь нэхъыщхьэ Щхьэгъэпсо Сэфарбий видеоконференцым хэтхэм яжриIащ академием къипщытэж пIалъэм къриубыдэу екIуэкIа Iуэхугъуэхэр зыхуэдэр, дунейм ехыжауэ, зи узыншагъэм къимыхьэжу мылэжьэжхэр хэгъэкIыжын зэрыхуейр къыхигъэщащ, ЩIДАА-м хагъэхьэн хуейуэ яубзыхуахэм я цIэр къриIуащ.
- ЩIэныгъэлIхэм зэгъусэу яубзыхуащ ЩIДАА-р къэкIуэну илъэсым зиужь итыну Iуэхугъуэхэр икIи Президиумыр зэрылэжьэну планыр ягъэпсащ.
- Къанокъуэ Арсен жиIащ иджыпсту адыгэм и Iуэху дэгъэкIыным елэжьу щыIэр зэгухьэныгъитI къудейр — ЩIэныгъэхэмкIэ Дунейпсо Адыгэ Академиемрэ Дунейпсо Адыгэ Хасэмрэ — зэрыарар. ДяпэкIэ адыгэ лъэпкъым, щIалэгъуалэм яфI зыхэлъ Iуэхухэм теухуа проектхэр ЩIДАА-м утыку кърихьэн, ахэр гъэзэщIэным егугъун зэрыхуейр дыщIигъуащ Къанокъуэм.
- ЗэIущIэм щыжаIахэм теухуа тхыгъэ ди газетым тетынущ.
- НэщIэпыджэ Замирэ.