Нэрылъагъут бийр зэрыхагъэщIэнур
2020-06-20
- Урысей Федерацэм и Президентым унафэ зэрищIам тету 1996 гъэ лъандэрэ мэкъуауэгъуэм и 22-р — Хэку зауэшхуэм щыщIидза махуэр — Фэеплъымрэ щыгъуэмрэ я махуэу ягъэуващ.
- 1941 гъэм мэкъуауэгъуэм и 22-м Германием и дзэр СССР-м къытеуауэ щытащ. Дивизэ 200-м щIигъу хъу бийхэр я къарукIи, зауэлIкIи куэдкIэ нэхъ лъэрыхьт, зауэм зыхуэзымыгъэхьэзыра ди къэралым нэхърэ.
- Гитлер мурад ищIат ди хэкур иубыду, абы и къулеигъэ псори зыIэригъэхьэну. ИкIи зауэр щIидзэн ипэкIэ абы къыдиушта IэщIагъэлIхэм зрагъэлъэгъуат ди къэралым и тIасхъапIэхэр.
- Псалъэм папщIэ, абыхэм ялъэгъуат ди дзэхэр жьы хъуа IэщэхэмкIэ фIэкIа зэрызэщIэмыузэдар. Уеблэмэ, ахэри къаймэщIэкIырт. КъищынэмыщIауэ, КъухьэпIэ гъунапкъэ округыр зауэм хуэхьэзырыххэтэкъым. Апхуэдэу кхъухьлъатэщIэ минитIым щIигъу зэхэтт, иракIэну гъэсыныпхъэхэр къаIэрымыхьауэ.
- Мис апхуэдэу щIидзащ Хэку зауэшхуэм. Фашистхэр щынэхъ лъэщт щIылъэми, тенджызми, уэгуми. Ахэр псынщIэу къыкIуэцIрыкIащ СССР-м и щIыналъэм. Пэжщ, езыхэри хэщIыныгъэншэ хъуакъым. Къыщыттеуа япэ махуэм и закъуэ бийм фIэкIуэдащ кхъухьлъатэ 400-м щIигъу. АрщхьэкIэ, къызэтрагъэувыIэфакъым.
- СССР-р хагъащIэмэ, Гитлер нэхъ- ри лъэрызехьэ хъуауэ езыхэми зэрезэуэнур зыщIэ США-мрэ Инджылызымрэ къагурыIуащ къащыщIы-нур икIи ерыскъырэ IэщэкIэ дыдейхэм къадэIэпыкъуу щIадзащ. АрщхьэкIэ абыхэм заIэжьэрт, езыхэр нэмыцэхэм япэщIэмыувэу. КъыддэIэпыкъуу щыщIадзари, Совет Союзым и закъуэ Гитлер зэрыригъэкIуэтыфынур белджылы ящыхъуа нэужьщ.
- СССР-м уасэшхуэ дыдэ щIитащ мы гъэм илъэс 75-рэ ирикъуа ТекIуэныгъэ Иным — цIыху мелуан 27-м я гъащIэр ихьащ. Совет Союз абрагъуэм зы унагъуи исакъым 1941 гъэм мэкъуауэгъуэм и 22-м зыщIидза Хэку зауэшхуэм и гуауэр зылъэмыIэса. Ди цIыхухэм лъы куэд ягъэжэн хуей хъуащ щыпсэу къэралым и щхьэхуитыныгъэр яхъумэн папщIэ. Дэ къытхуэнэжыр абы хэкIуэда ди зауэлIхэм я фэеплъыр сакъыу тхъумэнырщ, яхуэфащэу дунейм дытетынырщ.
- НэщIэпыджэ Замирэ.