ФIыщIэрэ щытхъурэ зыхуэфащэхэр
2020-06-20
- СССР-м и Совет Нэхъыщхьэм и Президиумым 1980 гъэм жэпуэгъуэм и 1-м унафэ къищтауэ щытащ Медицинэм и лэжьакIуэм и махуэр ягъэувыну. Абы щегъэжьауэ, илъэс 40 хъуащи, мэкъуауэгъуэм и ещанэ тхьэмахуэр цIыхухэм я узыншагъэр, гъащIэр хъумэнымкIэ IэнатIэм пэрытхэм я махуэшхуэщ.
- Дэтхэнэ зы IэщIагъэми гъащIэм мыхьэнэшхуэ щиIэщ, ауэ ар медицинэм епхамэ, абы пылъ жэуаплыныгъэр куэдкIэ нэхъ инщ, сыт щхьэкIэ жыпIэмэ а унэтIыныгъэм и лэжьакIуэхэм цIыхум нэхъ лъапIэ дыдэу иIэр — и узыншагъэр, и гъащIэр — дзыхь хуащI. Абы къыхэкIыу я Iэзагъэм, щIэныгъэм хагъахъуэ зэпыту екIуэкIын хуейщ, медицинэм щIэуэ къыхыхьэ псори я лэжьыгъэм нэсу къыщагъэсэбэпыфын хуэдэу.
- Дэтхэнэ зы унэтIыныгъэми хуэ-дэу, медицинэми зэхъуэкIыныгъэхэр къыхыхьащ, псынщIэу зызыхъуэж зэманым къыздихьащ узыр щыуагъэншэу къэхутэнымкIэ сэбэпышхуэ хъу IэмэпсымэщIэ куэд. Апхуэдэу щытми, сымаджэм и дежкIэ нэхъыщхьэр дохутырым и гу щабагъырщ, псэ къабзагъырщ, и гущIэгъурщ, и зэхэщIыкIырщ, и псалъэ гуапэхэрщ. Мис ахэр псо- ри зэуIуу хэлъын хуейщ медици- нэм и лэжьакIуэ нэсым. Гуапэ зэрыхъунщи, ди республикэм ди мащIэкъым зыпэрыт IэнатIэм зэфIэкI лъагэхэр щызиIэ, цIыхухэм зи цIэр фIыкIэ къраIуэ дохутырхэр. Апхуэдэуи щытхъурэ фIыщIэрэ яIэу ди щIыналъэм щыщ дохутыр куэд Урысейм и хэгъэгухэм и мызакъуэу, хамэ къэралхэми щолажьэ.
- Узыншагъэр хъумэнымкIэ IэнатIэр иджы къэрал политикэм щагъэнэхъапэхэм ящыщщ. Ди республикэр къэтщтэнщи, иужьрей илъэсхэм абы зэхъуэкIыныгъэфI-хэр къыщыхъуащ: медицинэ IуэхущIапIэщIэхэр яухуащ, куэдым зэгъэпэщыжыныгъэ лэжьыгъэхэр щрагъэкIуэкIащ, ахэр иджырей IэмэпсымэхэмкIэ къызэрагъэпэщ, щIэныгъэ куу зыбгъэдэлъ IэщIагъэлIхэр гъэхьэзырынми гулъытэ хэха хуащI.
- ИпэжыпIэкIэ, дохутыр IэщIагъэр жэуаплыныгъэшхуэ зыпылъщ икIи икъукIэ лэжьыгъэ хьэлъэщ. Абы къыхэкIыуи дохутырхэм пщIэшхуэ яхуэфащэщ. Тыншкъым махуэ къэс цIыхум и узыншагъэм, апхуэдэу щыхъукIи и гъащIэм и хъумакIуэу ущытыныр. Абыхэм я дежщ къыщежьэр жылагъуэ узыншэм и лъабжьэр. Псом хуэмыдэу нобэрей зэманым, дуней псор COVID-19 узыфэ зэрыцIалэм щытыкIэ гугъум щригъэувам, дохутырхэрщ гугъуехь тIуащIэр зи пщэ къыдэхуар. Абыхэм я къару псори хуаунэтIащ уз шынагъуэм цIыхухэр къызэрырагъэлыным. Узыфэ зэрыцIалэхэм еIэзэ дохутырхэм махуэри жэщри сымаджэщым щагъакIуэ, лэжьэгъуэ сыхьэтыр нагъэсами, ахэр я унэхэм екIуэлIэжыну Iэмал ямыIэу. Абыхэм я псэемыблэж лэжьыгъэм и фIыгъэкIэ цIыху мин бжыгъэхэр уз шынагъуэм къыIэщIэкIыфащ. Шэч къытумыхьэу жыпIэ хъунущ нобэ ди зэманым и лIыхъужь нэхъыщхьэу ахэр зэрыщытыр.
- Медицинэм и лэжьакIуэ псоми я махуэшхуэмкIэ дохъуэхъу. ЕхъулIэныгъэ, узыншагъэ быдэ яIэу, фIыщIэмрэ щытхъумрэ щымы-щIэу, цIыхухэр къахуэарэзыуэ, я лэжьыгъэм и хъер ялъагъуу я IэнатIэ мытыншыр ирахьэкIыну ди гуапэщ.
- ЩхьэщэмыщI Изэ.