Уэртэн Мухьэмэд Исмэхьил и къуэр
2020-06-20
- Мэкъуауэгъуэм и 18-м дунейм ехыжащ мэкъумэш щIэныгъэхэм я кандидат Уэртэн Мухьэмэд Исмэхьил и къуэр.
- Уэртэн Мухьэмэд 1943 гъэм накъыгъэм и 13-м Бахъсэн щIыналъэм хыхьэ Къулъкъужын Ипщэ къуажэм къыщалъхуащ. Курыт школыр дыщэ медалкIэ къиухри, Къэбэрдей-Балъкъэр къэрал университетым зоотехниемкIэ и къудамэм щIэтIысхьащ. ЩIэныгъэм хуэнэхъуеиншэ щIалэр Ленин В. И. и цIэкIэ ягъэува стипендиер къихьу еджащ икIи университетыр диплом плъыжькIэ къиухащ. Абы иужькIэ Уэртэныр Москва къа-лэм дэт, Тимирязевым и цIэр зезыхьэ урысей аграрнэ университетым и аспирантурэм щеджащ. И кандидат лэжьыгъэр ехъулIэныгъэкIэ пхигъэкIри, мэкъумэш щIэныгъэхэм я кандидат цIэр къыфIащащ.
- Уэртэн Мухьэмэд и лэжьыгъэ гъуэгуанэр езыр къыщалъхуа къуажэм къыщожьэ — жылэм щызэхэт совхозым и зоотехник нэхъыщхьэу къыщIидзэри, иужькIэ абы и унафэщIу илъэс куэдкIэ лэжьащ.
- Бахъсэн къалэ къэIэпхъуа нэужь, район администрацэм зоотехник нэхъыщхьэу щылэжьащ. ИужькIэ ЩоджэнцIыкIу Алий и цIэр зезыхьэ колхозым зоотехник нэхъыщхьэу ягъэкIуащ. Илъэс зыбжанэкIэ абы щыIауэ, ипэкIэ зыпэрыта IэнатIэм — Бахъсэн район администрацэм и зоотехник къулыкъур зэрихьэну ирагъэблэгъэжащ. А IэнатIэм пэрыту Уэртэныр пенсэм кIуащ.
- Сыт хуэдэ IэнатIэ Iумытами, Мухьэмэд зэфIэкI лъагэ зиIэ IэщIагъэлI нэсу зыкъигъэлъэгъуащ, пщэрылъ къыхуащI сыт хуэдэ Iуэхури нэгъэсауэ зэфIэзыгъэкI лэжьакIуэшхуэу щытащ.
- Уэртэн Мухьэмэд Исмэхьил и къуэр хабзэрэ цIыхугъэшхуэрэ хэлъу, и псалъэ иIыгъыжыфу, цIыху гуапэу, гущIэгъулыуэ, хэти дэIэпыкъуну хьэзыру дунейм тетащ.
- Унагъуэ дахэм и тхьэмадэу, адэ, адэшхуэ гумащIэу, ныбжьэгъу пэжу зи гъащIэр езыхьэкIа нэхъыжьыфIым и фэеплъыр яхъумэнущ абы и благъэ-Iыхьлыхэм нэмыщIа, ар зыцIыхуу щыта псоми.
- КъБР-м Мэкъумэш хозяйствэмкIэ и министерствэ,
- Бахъсэн районым и щIыпIэ администрацэ,
- Къэбэрдей Адыгэ Хасэ.