Ди республикэми щекIуэкIынущ
2020-06-20
- Мэкъуауэгъуэм и 22-м, Фэеплъымрэ щыгъуэмрэ я махуэм, гъэ къэс йокIуэкI «Фэеплъым и шэху уэздыгъэ» лъэпкъпсо Iуэхур. Апхуэдэ щIыкIэкIэ цIыхубэр хуощыгъуэ Хэку зауэшхуэм хэкIуэдахэм. Мы гъэм дызэрыт щытыкIэм къыхэкIыу, шэху уэздыгъэхэр онлайну щIагъэнэну аращ. ЩIагъанэ къудей мыхъуу, дэтхэнэ зы уэздыгъэми зы сом щхьэщатыкIынущ. Акцэм къыхэкIыну ахъшэр Хэку зауэшхуэм и ветеранхэм я узыншагъэр ирагъэфIэкIуэным трагъэкIуэдэнущ. Ар мэкъуауэгъуэм и 21 — 22 махуэхэм я зэхуаку дэлъ жэщым щIагъэнэну аращ.
- Коронавирус уз зэрыцIалэм къыхэкIыу цIыхухэр уэрамым къыдэмыхьэми, мэкъуауэгъуэм и 22-м сыхьэт 12-рэ дакъикъэ 15-м зы дакъикъэкIэ щыму я щхьэхэр хуагъэщхъынущ Хэку зауэшхуэм хэкIуэда- хэм. А махуэм КъБР-м и щэнхабзэм и лэжьакIуэхэр хэту онлайн-концерт екIуэкIынущ, абы фыщеплъыфынущ КъБР-м ЩэнхабзэмкIэ и министерствэм и сайтым.
- Телевиденэмрэ социальнэ сетхэмрэ щагъэлъэгъуэнущ Хэку зауэшхуэм и ветеранхэм, тылым и лэжьакIуэхэм, зауэм и бынхэм я гукъэкIыжхэмрэ хъыбархэмрэ.
- «Династия» кинокомпаниемрэ ШколакIуэхэм я дунейпсо зэщIэхъееныгъэмрэ «Зауэм и бынхэр» урысейпсо акцэ ирагъэжьащ. Абы ипкъ иткIэ, видеоролик 20 трахынущ сабийхэр ирагъэплъын папщIэ. А Iуэхум и купщIэр блэкIар зыщымыгъэгъупщэнырщ, къэкIуэну зэманым апхуэ-дэ зауэ къыщымыхъуным хущIэкъунырщ.
- «Си сабиигъуэр зауэм хиубыдат» урысейпсо акцэм ипкъ иткIэ, Нобель и саугъэтым и лауреат Шолохов Михаил къызэралъхурэ илъэси 115-рэ зэрырикъум и щIыхькIэ, ирагъэжьащ «Судьба человека. Живая книга» дунейпсо литературэ-макъамэ марафоныр. КъБР-м и библиотекэхэр а марафоным хэтынущ икIи я Инстаграм напэкIуэцIхэм къралъхьэнущ Шолохов Михаил и «Судьба человека» Iуэтэжым щыщ пычыгъуэхэм къеджэу.
- Къэбарт Мирэ.