«Iуащхьэмахуэ» журналым фыкъыщеджэ
2020-06-06
«Iуащхьэмахуэ» литературэ-художественнэ, жылагъуэ-политикэ журналым и къыкIэлъыкIуэ къыдэкIыгъуэр — 2020 гъэм и етIуанэ номерыр — дунейм къытехьащ. Ди жагъуэ зэрыхъунщи, иджыпсту дызэрыт щытыкIэ гугъум къыхэкIыу, Iэ щIэзыдза псоми ар яIэрыхьакъым. Абы еджэну зэкIэ Iэмал зиIэр пощткIэ къызыхуахьхэрщ, редакцэм къыщызыщтэжхэмрэ зыхуашэж IуэхущIапIэхэмрэ иджыри лъагъэIэсыжыфакъым.- Журналым и жьантIэр хуэфащэ дыдэу лъысащ тхакIуэ цIэрыIуэ МэшбащIэ Исхьэкъ — ар къызэралъхурэ мы гъэм илъэс 90 ирикъуащ. «Адыгэ литературэм и классик» фIэщыгъэм щIэт, тхакIуэм и гъащIэмрэ и гуащIэмрэ теухуа тхыгъэ купщIафIэр и къалэмыпэ къыщIэкIащ Исхьэкъ фIыуэ зыцIыху, абы и творчествэм дихьэх, Адыгэ Республикэм щIыхь зиIэ и журналист НэщIэпыджэ Замирэ. Абы къыкIэлъокIуэ МэшбащIэм и ныбжьэгъухэу БакIуу Хъанджэрий, ХьэфIыцIэ Мухьэмэд, Елгъэр Кашиф сымэ тхакIуэм хуагъэза я тхыгъэхэр, нэгъуэщIхэми абы хужаIахэм щыщ пычыгъуэхэр. Журналым и напэкIуэцI тIощIым щIигъур езы Исхьэкъ и IэдакъэщIэкIхэм лъысащ — «Хэхэсхэр» роман цIэрыIуэм къыхэха пычыгъуэхэмрэ и гукъэкIыжхэм ящыщу Кастрэ Фидель зэрыхуэзамрэ.
- Фырэ-Къаныкъуэ Анфисэ и «Мэуэтхэр» тхыдэ романращ прозэ рубри-кэр къызэIузыхыр. Абы и пэщIэдзэр япэ номерым тетащ, пызыщэ Iыхьэр мы къыдэкIыгъуэм дыкъыщоджэ.
- Журналым и щIэджыкIакIуэхэм зэрафIэгъэщIэгъуэнынум шэч хэлъкъым Мэлей ФатIимэ и Iуэтэж кIэщIхэр. Абыхэм гъащIэм дызыщрихьэлIэ Iуэхухэр гукъинэжу къызэрыщыIэтам и мызакъуэу, КъБР-м и цIыхубэ усакIуэ Бещтокъуэ Хьэбас тхакIуэ бзылъхугъэм и творчествэм псалъэ гуапэ зэрыхужиIам къегъэлъагъуэ гулъытэ зыхуэпщI хъун хуэдэу ФатIимэ и творчествэр зэрыщытыр.
- Усыгъэм и лъахэм дыхешэ зи псэр макъамэмрэ усэмрэ зэхуэдэу игъэушэ композитор ХьэIупэ ДжэбрэIил. И IэдакъэщIэкIхэр дунейм къытехьэным, газетхэмрэ журналхэмрэ къытрадзэным, тхылъ щхьэхуэу къыдэгъэкIыным ар зэрыхущытыр зыщIэхэм къагурыIуэнущ и усэу щэщIым нэблагъэ зытригъэдза «Iуащхьэмахуэм» абы пщIэ зэрыхуищIыр.
- «Литературэ щIэныгъэ. Критикэ» рубрикэр нэхъыбэу зыфIэгъэщIэгъуэну къысщыхъур щIэныгъэлIхэрщ е литературэм фIыуэ хэзыщIыкI, абы и къэхъугъэхэм щыгъуазэ цIыхухэрщ. Журналым а и Iыхьэм итщ филологие щIэныгъэхэм я кандидат Хьэвжокъуэ Людмилэ «Лъэпкъ литературэм и лъагапIэщIэ» зыфIища, Бещтокъуэ Хьэбас и «МэзылIымрэ мацIэмрэ» роман-арабескэм теухуар.
- АдэкIэ даIуощIэ адыгэ Олимп лIыхъужьхэм. КъБР-м щIыхь зиIэ и журналист Жыласэ Заурбэч щIэджыкIакIуэхэм ярегъэцIыху ди лъэпкъым къыхэкIауэ зэман зэмылIэужьыгъуэхэм Олимпиадэхэм текIуэныгъэ къыщызыхьахэр. Апхуэдэхэщ Догу (ГъукIэ) Яшар, Къаплъэн (Ущхъуэ) Хьэмид, Аталай (Нагъуэ) Мэхьмуд, Чыржын Мухьэрбий, Шыхъуэ Борис, Ахэмын Еленэ, Къардэн Мурат, Хъущт Аслъэнбэч, Мудрэн Беслъэн сымэ. А тхыгъэм къыкIэлъокIуэ «Адыгэбзэр хъумэным теухуа Iуэху щхьэпэ» фIищауэ методист Нанэ Любэ къытхуитха тхыгъэр.
- «IуэрыIуатэ» Iыхьэм мызыгъуэгукIэ, дыкъыщоджэ Гуэргуэныжь хасэм зэрыкIуам.
- ГъащIэм хуэнабдзэгубдзаплъэ, абы и нэгу щыщIэкIхэр дахэу гъэщIэрэщIауэ усэбзэкIэ ди пащхьэм къизылъхьэ Нэгъуей Радимэ и IэдакъэщIэкIхэр къыщыхьащ къыкIэлъыкIуэ напэкIуэцIхэм.
- Журналыр зэхуещIыж куэд дэзыхьэх икIи зыпэплъэ псалъэзэблэдзым.
- ИСТЭПАН Залинэ,
- «Iуащхьэмахуэ» журналым
- жэуап зыхь и секретарь.