Нобэрэ пщэдейрэ
2019-09-17
- ФокIадэм и 17, гъубж
- Брянск областыр нэмыцэ-фашист зэрыпхъуакIуэхэм къыщыIэщIагъэкIыжа махуэщ
- США-м и Конституцэмрэ и гражданствэмрэ я махуэщ. 1787 гъэм США-м и Конституцэр къащтащ.
- Болгарие Республикэм и къалащхьэ Софие и махуэщ
- 1630 гъэм Америкэ Ищхъэрэм и къуэкIыпIэ хы Iуфэм деж Бостон къалэм и лъабжьэр щагъэтIылъащ Инджылызым и Бостон къалэм иIэпхъукIахэм.
- 1922 гъэм Берлин дунейм щыяпэу щагъэлъэгъуащ макъ зыщIэт фильмыр.
- 1922 гъэм Урысейм щыяпэу радиокIэ концерт къатащ. Апхуэдэу лэжьэн щIидзауэ щытащ «Москва и радиом».
- 1932 гъэм СССР-м и ЦИК-м и Президиумым, Горький Максим къыхилъхьа жэрдэмым ипкъ иткIэ, унафэ къищтащ Литературэ институт къызэгъэпэщыным теухуауэ. 1946 гъэм а еджапIэ нэхъыщхьэм Горький Максим и цIэр фIащащ.
- 1941 гъэм СССР-м унафэ къыщащтащ къэралым щыпсэу псори дзэ Iуэхухэм Iэмал имыIэу хуегъэджэным теухуауэ.
- 1941 гъэм ВКП(б)-м и Къэбэрдей-Балъкъэр обкомым унафэ къищтащ республикэм щыщу цIыху 450-рэ Дзэ Плъыжьым и десантыдзэм игъэкIуэну.
- 1988 гъэм Корее Ипщэм и къалащхьэ Сеул къыщызэIуахащ ХХIV гъэмахуэ Олимп Джэгухэр. Ахэр фокIадэм и 17 — жэпуэгъуэм и 2-хэм екIуэкIащ. Медаль нэхъыбэ дыдэ къихьри, СССР-м и командэ къыхэхам абыхэм япэ увыпIэр щиубыдауэ щытащ.
- 1991 гъэм Латвиер, Литвар, Эстониер, КНДР-р, Корее Ипщэр ООН-м хагъэхьащ.
- Урыс дохутыр-терапевт цIэрыIуэ, профессор, жылагъуэ лэжьакIуэ Боткин Сергей къызэралъхурэ илъэси 187-рэ ирокъу.
- Совет еджагъэшхуэ, къэхутакIуэ, космонавтикэм и лъабжьэр зыгъэтIылъа Циолковский Константин къызэралъхурэ илъэси 162-рэ ирокъу.
- УсакIуэ, жылагъуэ лэжьакIуэ, КIыщокъуэхэ Рашидрэ Алимрэ я адэ КIыщокъуэ Пщымахуэ къызэралъхурэ илъэси 142-рэ ирокъу.
- Урысей актёр, кинорежиссёр, сценарийхэр зытх, УФ-м и цIыхубэ артист, «Оскар» саугъэтыр зи фильмым къыхуагъэфэща Меньшов Владимир и ныбжьыр илъэс 80 ирокъу.
- Филологие щIэныгъэхэм я доктор, КъБКъУ-м и профессор, ЩIДАА-м и академик БакIуу Хъанджэрий и ныбжьыр илъэс 79-рэ ирокъу.
- УФ-м щIыхь зиIэ и егъэджакIуэ Ачмыжь Мариет (АР) къыщалъхуа махуэщ.
- «Адыгэ псалъэ» газетым узыншагъэмрэ щIыуэпсыр хъумэнымкIэ и къудамэм и унафэщI, Адыгэ Республикэм щIыхь зиIэ и журналист ЩхьэщэмыщI Изэ къыщалъхуа махуэщ.
- Урысей хоккеист, УФ-м спортымкIэ щIыхь зиIэ и мастер, дунейм щэнейрэ и чемпион Овечкин Александр и ныбжьыр илъэс 34-рэ ирокъу.
- Дунейм и щытыкIэнур
- «pogoda.yandex.ru» сайтым зэритымкIэ, Налшык пшэр техьэ-текIыу щыщытынущ, пIалъэ-пIалъэкIэрэ уэшх къыщешхынущ. Хуабэр махуэм градус 20 — 23-рэ, жэщым градус 15 — 17 щыхъунущ.
- ФокIадэм и 18, бэрэжьей
- Псым и фIагъыр къэпщытэным и дунейпсо махуэщ
- Азербайджаным и лъэпкъ макъамэм и махуэщ
- Армением щагъэлъапIэ астрономием и махуэр
- Ираным щагъэлъапIэ къэжэр литературэмрэ усыгъэмрэ я махуэр
- 1810 гъэм хэIущIыIу ящIащ Чилир Испанием зэрыхэмытыжыр, ар къэрал щхьэхуиту зэрыщытыр.
- 1793 гъэм США-м и президент Вашингтон Джордж къэралым и Конгрессым и унэ Капитолийм и лъабжьэр игъэтIылъащ.
- 1929 гъэм СССР-м япэ комбайнхэр, «Коммунар» зыфIащахэр, къыщыщIагъэкIыу щIадзащ.
- 1934 гъэм СССР-р Лъэпкъхэм я Лигэм хыхьащ.
- 1947 гъэм США-м ЦРУ-р (ТIасхъэщIэх управленэ нэхъыщхьэр) къыщызэрагъэпэщащ.
- 1954 гъэм лажьэу яутIыпщащ Камэ псым тращIыхьа ГЭС-р.
- 1991 гъэм Украинэм и Радэ Нэхъыщхьэм унафэ къищтащ щIыху-гъуэжьыфэу зэгуэлъ ныпыр я къэралым и бэракъыу зэрыщытым теухуауэ.
- Шэрджэс тхакIуэ Хьэбэчыр БетIал къызэралъхурэ илъэси 113-рэ ирокъу.
- Совет кхъухьлъатэзехуэ, Совет Союзым и ЛIыхъужь Талалихин Виктор къызэралъхурэ илъэси 101-рэ ирокъу.
- Совет космонавт, Совет Союзым тIэунейрэ и ЛIыхъужь Рукавишников Николай къызэралъхурэ илъэс 87-рэ ирокъу.
- КъБР-м и цIыхубэ артисткэ Мэшыкъуэ Феня къыщалъхуа махуэщ.
- Опернэ уэрэджыIакIуэ, Урысейм и цIыхубэ артисткэ Нетребкэ Аннэ и ныбжьыр илъэс 48-рэ ирокъу.
- Дунейм и щытыкIэнур
- «pogoda.yandex.ru» сайтым зэритымкIэ, Налшык уэфIу щыщытынущ. Хуабэр махуэм градус 25 — 27-рэ, жэщым градус 15 — 17 щыхъунущ.