Сабийхэм къащхьэщыжынымкIэ дунейпсо махуэм КIуэкIуэ Казбек щыIащ Приближнэ станицэм дэт интернат еджапIэм
2019-06-04
- КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек Прохладнэ районым хыхьэ Приближнэ станицэм дэт интернат еджапIэ №2-м щыIащ икIи Сабийхэм къащхьэщыжынымкIэ дунейпсо махуэмкIэ цIыкIухэм ехъуэхъуащ.
- ЩIыналъэм и унафэщIыр школым и лэжьакIуэхэм яхуэзащ икIи республикэм щыIэ интернат IуэхущIапIэхэм къэрал дэIэпыкъуныгъэ етыным, зи узыншагъэр зэкIэлъымыкIуэ сабийхэр егъэджэнымрэ я зэфIэкIым хэгъэхъуэнымкIэ щыIэ Iэмалхэр егъэфIэкIуэным, IуэхущIапIэр иджырей IэмэпсымэхэмкIэ, унэлъащIэкIэ къызэгъэпэщыным тепсэлъыхьащ.
- Иджыпсту программэ хэхахэм тету мыбы щрагъаджэ тэмэму мыпсэлъэф е нэгъэсауэ зэхэзымых сабий 85-рэ. ЩIэныгъэ гуэдзэн егъэгъуэтынымкIэ программэхэм япкъ иткIэ зи тхьэкIумэр лажьэхэр къэфэным, тэмэму мыпсэлъэфхэр уэрэд жыIэным хуагъасэ, апхуэдэу спорт гупжьей щхьэхуэхэр щыIэщ. Мы еджапIэм щIэсхэр мызэ-мытIэу щытекIуащ республикэм, къэралым къыщызэрагъэпэщ зэпеуэ зэмылIэужьыгъуэхэм.
- Интернат еджапIэм щIэсхэм хьэщIэхэр ирагъэплъащ Сабийхэм къащхьэщыжынымкIэ дунейпсо махуэм ирихьэлIэу ягъэхьэзыра концертым.
- «Гуапэу дызэревгъэблэгъам, ди дэрэжэгъуэр зэрыфIэтам папщIэ берычэт бесын! ЕгъэджакIуэхэм фIыщIэ ин фхудощI фи лэжьыгъэм фи гур етауэ фызэрыбгъэдэтым папщIэ»,- иритхащ КIуэкIуэ Казбек Инстаграмым щиIэ напэкIуэцIым.
- КъБР-м и Iэтащхьэмрэ
- Правительствэмрэ
- я пресс-IуэхущIапIэ.