Куэдым ущызыгъэгугъ кIэух
2019-06-04
- «Спартак-Налшык» (Налшык) — «Спартак-Владикавказ» (Владикавказ) — 3:0 (2:0). Налшык. «Спартак» стадион. Накъыгъэм и 31-м. ЦIыху 250-рэ еплъащ.
- Судьяхэр: Холин, Охрименкэ (тIури Мейкъуапэ щыщщ), Городовой (Ставрополь).
- «Спартак-Налшык»: Щоджэн, КIэдыкIуей, Белоусов, Ольмезов, Тебэрды, Хьэшыр, Салахетдинов, Дэхъу, Гуэнгъэпщ, Машэжь, Мэшыкъуэ.
- «Спартак-Владикавказ»: Аршиев, Кочиев, Шавлохов, Качмазов, Альборов, Цараев, Багаев, Камболов, Букия, Базаев, Кучиев.
- Топхэр дагъэкIащ: Гуэнгъэпщым, 4 (1:0). Мэшыкъуэм, 26 (2:0). Белоусовым, 78 (3:0).
- Урысей Федерацэм футболымкIэ и етIуанэ дивизионым и «Ипщэ» гупым 2018 — 2019 гъэхэм щекIуэкIа зэхьэзэхуэр «Спартак-Налшыкым» иухыфынут етхуанэ увыпIэм щыту. Абы папщIэ налшыкдэсхэм я стадионым щыхагъэщIэн хуейм и закъуэтэкъым сыт щыгъуи я ныкъуэкъуэгъу нэхъыщхьэ Осетие Ищхъэрэ — Аланием и футболистхэр, атIэ зы мащIэкIэ япэ къит Мейкъуапэ и «Дружба»-мрэ Мэхъэчкъалэ и «Легион-Динамомрэ» хьэщIапIэ щыIэхэу текIуэн хуейтэкъым. Апхуэдэ кIэухыр къэмыхъуфыну щыттэкъым, ауэ япэщIыкIэ ди щIалэхэм я очкоищыр зыIэрагъэхьэн хуейт. Абы папщIэ я лъэкI къагъэнауи пхужыIэнукъым.
- Мы гъэм и гъатхэм зэхьэзэхуэм зэрыщIадзэжрэ ирагъэкIуэкIа зэIущIэ пщыкIузым ящыщу зы закъуэ фIэкIа зыфIамыхьа «Спартак-Налшыкым» джэгур хуабжьу жыджэру къыщIидзащ. Нэрылъагъут кIэух зэIущIэр гуIэфIтещIэж ящIыну абы хэтхэр зэрыщIэхъуэпсыр. Зэпеуэм и япэ къекIуэкIыгъуэм Владикавказ щыIэжу я нобэрей хьэрхуэрэгъухэм 1:2-уэ зэрыфIахьам хуэфэщэн жэуап иратыну я нэ къикIырт хьэщIэхэми. А псоми зэпэщIэтыныгъэр удэзыхьэх ищIырт.
- Джэгум щIидзэри дакъикъиплI дэкIауэ арат «Спартак-Налшыкыр» япэ щищам. Гуэнгъэпщ Албэч владикавказдэсхэм я штрафнойм къыщыIэрыхьа топыр игъэIэкIуэлъэкIуащ икIи Iэзэ дыдэу бжыгъэр къызэIуихащ.
- Хуабжьу дахэ хъуащ 26-нэ дакъикъэм Мэшыкъуэ Ислъам зэгуэрым зыхэта «Спартак-Владикавказым» щхьэкIэ худигъэкIа топри. Ар апхуэдизу лъэщу еуати, къезыгъэгъэзэфын щыIэу фIэщщIыгъуейт.
- Арати, сыхьэт ныкъуи мыджэгуауэ, зэIущIэм кърикIуэнур наIуэ хъуащ. Хуэбгъэфэщэну гугъут «Спартак-Владикавказ»-м абы зэхъуэкIыныгъэ гуэрхэр хилъхьэфыну. А Iуэхум ар елIэлIэщауи фэ теткъым.
- Загъэпсэхуу къихьэжа иужькIи ди щIалэхэр зэрынэхъ жыджэрт. Ахэрат бжыгъэм зезыгъэхъуэжыфыну Iэмал гъуэзэджэхэр къызыхукъуэкIхэр. Псом хуэмыдэу хьэлъэтышхуэ иIэт Гуэнгъэпщ Албэч. АрщхьэкIэ мы зэхьээхуэм кIэух дахэ езытар Белоусов Никитэщ. Налшыкдэсхэр штрафной щеуэм ар хьэщIэхэм я гъуэм ебгъэрыкIуащ икIи щхьэкIэ бжыгъэр 3:0-м нигъэсащ.
- ДжэгукIэ дахэ, узыIэпызышэ къагъэлъэгъуауэ «Спартак-Налшыкым» и футболистхэм кърахьэлIащ 2018-2019 гъэхэм я зэпеуэр. Псом хуэмыдэу уегъэгуфIэ Трубицин Сергей зи Iэтащхьэ тренер гупым ди щIыпIэм къыщалъхуа, зыщызыгъэса щIалэщIэхэр тегъэщIапIэ зэращIам. Абы фIы къызэрырикIуари нэрылъагъущ: зэхьэзэхуэм щыпащэжа гъатхэ лъандэрэ ирагъэкIуэкIа джэгугъуэ пщыкIутIым я хьэрхуэрэгъухэм къащыпикIуэтар зэ закъуэщ. «Спартак-Налшык» футбол клубым фIызэтрихьауэ щыта щIыхуэхэри пшыныжа зэрыхъуар къэплъытэмэ, мазэрэ ныкъуэрэ дэкIмэ щIэзыдзэну зи чэзу зэхьэзэхуэм къалэн пыухыкIахэр гупым дяпэкIэ хуагъэувыну къыщIэкIынущ.
- Гуапэщ етIуанэ дивизионым и «Ипщэ» гупым гъуащхьауэхэм я зэпеуэм бжьыпэр зэрыщиубыдар Краснодар и «Урожай»-м и пашэ ди лъахэгъу Къалмыкъ Амур. Ар мы зэхьэзэхуэм пщыкIублрэ къыщыхэжаныкIащ. Абы зы топкIэ къыкIэрыхуащ «Чайка»-м и гъуащхьауэ Подбельцев Александр. «Спартак-Налшыкым» щыджэгу Мэшыкъуэ Ислъам ещанэ хъуащ, мы зэхьэзэхуэм топ пщыкIуз щыдигъэкIауэ.
- Зэхьэзэхуэр иуха щхьэкIэ, абы текIуэныгъэр къыщызыхьар зэхэкIыпакъым. Махуэ гъунэгъухэм унафэ тращIыхьынущ «Чайка» — «Черноморец» зэIущIэм Iулъхьэ щызекIуауэ гурыщхъуэ зэрыхуащIым. Абы елъытащ япэ дивизионым кIуэнур хэтми.
- Иджы фыщыдгъэгъуэзэнщ етIуанэ дивизионым и «Ипщэ» гупым 2018 — 2019 гъэхэм щекIуэкIа зэхьэзэхуэм и кIэух джэгугъуэм ипкъ иткIэ мэрем кIуам зэхэта зэIущIэхэм къарикIуа бжыгъэхэм: «Ангушт» (Нэзрэн) — «Динамо-Ставрополь» (Ставрополь) — 1:7, «Биолог-Новокубанск» (Прогресс) — «Дружба» (Мейкъуапэ) — 0:1, «Черноморец» (Новороссийск) — «Мэшыкъуэ-КМВ» (Псыхуабэ) — 2:0, «Волгарь» (Астрахань) — «Легион-Динамо» (Мэхъэчкъалэ) — 1:1, «Урожай» (Краснодар) — «Академия» (Дон Iус Ростов) — 3:0, СКА (Дон Iус Ростов) – «Чайка» (Песчанокопское) – 0:1.
- Жыласэ Заурбэч.