Хуэмурэ тегушхуэурэ…
2019-03-26
- «Спартак-Налшык» (Налшык) — «Краснодар-3» (Краснодар) — 2:0 (1:0). Налшык. «Спартак» стадион. Гъатхэпэм и 23-м. ЦIыху 200 еплъащ.
-
Мэшыкъуэ Ислъам етIуанэ топри дигъэкIащ.
- Судьяхэр: Холин (Мейкъуапэ), Жолобов (Волжский), Даниленкэ (Волгоград).
- «Спартак-Налшык»: Щоджэн, Лелюкаев, Ольмезов, Белоусов, Мэкъуауэ (Ашу, 69), Салахетдинов (Iэпщацэ, 33), Машэжь, Михайлов (Дэхъу, 88), Хьэшыр, Гуэнгъэпщ (КIэдыкIуей, 65), Мэшыкъуэ.
- «Краснодар-3»: Латышонок, Исаенкэ, Парадин, Назаров, Пивоваров (Чичбэ, 78), Якимов, Коломийцев (Фоменкэ, 78), Котов (Петерсон, 70), Iэпыч (Волков, 38), Бутенкэ, Рзаев.
- Топхэр дигъэкIащ: Мэшыкъуэм, 27-пенальтикIэ (1:0). Мэшыкъуэм, 74 (2:0).
- Дагъуэ къыхуащIащ: Назаровым, Хьэшырым, Парадиным, Михайловым, Дэхъум.
- МазиплIым щIигъукIэ зэпагъэуауэ щыта Урысей Федерацэм футболымкIэ и етIуанэ дивизионым и «Ипщэ» гупым 2018 — 2019 гъэ-хэм щекIуэкI зэхьэзэхуэм «Спартак-Налшыкыр» щэбэт кIуам хыхьэжащ. Дауи, абы хуэзэшат Къэбэрдей-Балъкъэрым топджэгум щыдихьэххэр.
- Налшыкдэсхэм кърагъэблэгъа «Краснодар-3» командэр зэпеуэм къыщыкIэрыхухэм ящыщ зыт икIи, пIалъэ кIыхькIэ зыбгъэпсэхуа иужькIэ, зэхьэзэхуэм урихыхьэжыну уасэ иIэтэкъым. АрщхьэкIэ хьэщIэхэми тыншу къикIуэтынухэм зыхабжэжыртэкъым.
- Джэгум зэрыщIидзэу «Краснодар-3»-м и футболист ныбжьыщIэхэм ебгъэрыкIуэу хуежьащ. Абы пэмыплъа хэгъэрейхэр Iэнку-ну икIуэтащ. Апхуэдэ щытыкIэм краснодардэсхэм Iэмал къаритащ ди гъуащхьэхъумэхэр хуабжьу ягъэгузэвэ-ну. Мызэ-мытIэу хьэщIэхэм бжыгъэр къызэIуахыфыну щытащ, арщхьэкIэ гъуащхьэтет Щоджэн Борис и Iэзагъым ахэр пэлъэщакъым.
- ЩIымахуэ зыгъэпсэху-гъуэ кIыхьым зи лъэр зэщIигъэна «Спартак-Налшыкри» ауэрэ къызэщыужащ. Абы хуэмурэ тепщэныгъэр зыIэщIигъэхьащ. 27-нэ дакъикъэм Машэжь Ратмир «Краснодар-3»-м и гъуащхьэхъумэхэм яIэщIэкIауэ и закъуэу гъуэм щыхуэкIуэм, ираудащ. Шэч къытримыхьэххэу судьям метр пщыкIузым и деж игъэлъэгъуащ. Пенальтир игъэзэщIэну бгъэдыхьа Мэшыкъуэ Ислъам хьэщIэхэм я гъуащхьэтетым зы гугъапIи иритакъым топым къригъэгъэзэну.
- Япэ зэрищам ди щIалэхэр нэхъри тригъэгушхуащ икIи адэкIэ бжьыпэр абыхэм яутIыпщакъым. Пэжщ, краснодардэсхэри ерыщу икIи шынагъуэу къащебгъэрыкIуэ щыIэт, арщхьэкIэ Щоджэн Борис зэрыщыуагъэншэт.
- Загъэпсэхуу къихьэжа иужькIэ, хьэщIэхэр къаруушхуэкIэ ди гъуэм къытегуплIащ. Абыхэм я мурадт икIэщIыпIэкIэ бжыгъэр зэхуэдэ ящIыжыну. АрщхьэкIэ налшыкдэсхэм апхуэдэ Iэмал къратакъым. Уеблэмэ, «Краснодар-3»-м и ебгъэрыкIуэныгъэхэр хуэмурэ игъэупщIыIури, «Спартак-Налшыкыр» езыр ипэкIэ кIуэтащ. 74-нэ дакъикъэм Мэшыкъуэ Ислъам щхьэкIэ дигъэкIа топым псоми наIуэ ящищIащ мы зэIущIэм хэт щытекIуэнуми. Ар 2:0-у иухащ, ди щIалэхэм япэ текIуэныгъэр мыгъэрей зэхьэзэхуэм къыщахьауэ.
- Зи чэзу очко щырыщыр зыIэрагъэхьащ етIуанэ дивизионым и «Ипщэ» гупым пашэныгъэр щызыIыгъхэми. Апхуэдэу бжыгъэ зэщхькIэ, 1:0-у, «Чайка»-м «Спартак-Владикавказ»-р и стадионым щыхигъэщIащ, «Урожай»-р Астрахань щыIэу «Волгарь»-м ефIэкIащ.
- Иджы фыщыдгъэгъуэзэнщ гъатхэпэм и 23-м зэхэта джэгугъуэм кърикIуа бжыгъэхэм. Мис ахэр: СКА (Дон Iус Ростов) — «Динамо-Ставрополь» (Ставрополь) — 0:2, «Чайка» (Песчанокопское) — «Спартак-Владикавказ» (Владикавказ) — 1:0, «Биолог-Новокубанск» (Прогресс) — «Легион Динамо» (Мэхъэчкъалэ) — 1:0, «Волгарь» (Астрахань) — «Урожай» (Краснодар) — 0:1, «Ангушт» (Нэзрэн) — «Академия» (Дон Iус Ростов) — 3:0.
- «Дружба» (Мейкъуапэ) — «Мэшыкъуэ-КМВ» (Псыхуабэ) зэIущIэр ягъэIэпхъуащ.
- Урысей Федерацэм футболымкIэ и етIуанэ дивизионым и «Ипщэ» гупым къыкIэлъыкIуэ джэгугъуэр гъатхэпэм и 30-м щекIуэкIынущ. А махуэм «Спартак-Налшыкыр» Краснодар къалэм щыIущIэнущ зэхьэзэхуэм пашэныгъэр щызыIыгъхэм ящыщ зы, адыгэ щIалэ зыбжанэ зыхэт «Урожай»-м.
- Жыласэ Заурбэч.