Къэралым щынэхъыфIхэу къалъытэ
2019-01-15
- Атлетикэ псынщIэмкIэ урысейпсо федерацэм (ВФЛА) блэкIа илъэсым къэралым и спортсмен нэхъыфIу къилъытащ ди лъахэгъу Ласицкене (Кучинэ) Марие. Абы и тренер Габрилян Геннадий 2018 гъэм Урысей Федерацэм и гъэсакIуэ нэхъыфIщ.
- Илъэсым кърикIуахэм щыхэплъэжу иджыблагъэ Мэзкуу щекIуэкIа ВФЛА-м и конференцым щагъэбелджылащ атлетикэ псынщIэмкIэ ди къэралым щыщу нэхъ ехъулIэныгъэфIхэр зиIахэр икIи саугъэт зэмылIэужьыгъуэхэр зыхуэфащэхэр яубзыхуащ. Урысей Федерацэм и спортсменкэ нэхъыфIу къызэхуэсахэм зэдэарэзыуэ къалъытащ Къэбэрдей-Балъкъэрым къыщалъхуа икIи зыщызыгъэса Ласицкене (Кучинэ) Марие. 2018 гъэм ди лъахэгъур лъагэу дэлъеинымкIэ зэпеуэ 25-м щытекIуащ, Бирмингем (Инджылызым) щыIа щIымахуэ дунейпсо чемпионатри яхэту.
- Жюрим гулъытэншэу къигъэнакъым Ласицкене и гъэсакIуэ Габрилян Геннадий. Марие и ехъулIэныгъэхэм я фIыгъэкIэ ар аргуэру къалъытащ Урысей Федерацэм и тренер нэхъыфIу.
- Ди лъахэгъухэм я саугъэт лъапIэхэр къыщратыжынущ атлетикэ псынщIэмкIэ Урысейм и щIымахуэ чемпионатыр къыщызэIуахкIэ. Мазаем и 13 — 15-м ар щекIуэкIынущ Мэзкуу къалэм.
- Жыласэ Заурбэч.