Режиссёр Фырэ Руслан куэд дыдэ хузэфIокI
2019-01-12
- ЩоджэнцIыкIу Алий и цIэр зезыхьэ Къэбэрдей къэрал драмэ театрым 2018 гъэр IуэхуфIхэмкIэ, гукъинэж спектаклыщIэхэмкIэ, зэпеуэ гъэщIэгъуэнхэмкIэ игъэнщIащ.
- Мы илъэсым абы щагъэува спектакль гукъинэжхэм ящыщщ: «Визит дамы» (Дюрренмат Ф., зыгъэувар Осетие Ищхъэрэ — Аланием и цIыхубэ артист Попов Валерийщ), «ХьэжьэIужьэ» (Касон А., зыгъэувар УФ-м, КъБР-м, Абхъазым щIыхь зиIэ я лэжьакIуэ, УФ-м и Правительствэм и саугъэтым и лауреат Фырэ Русланщ), «Си адэшхуэм фыз къызэришэжар» (Гецадзе А., зыгъэувар Фырэ Русланщ), нэгъуэщIхэри.
- Театреплъхэм фIыуэ ялъэгъуа спектакль къыхэхахэр Ставрополь, ЕсэнтIыгу, Ярославль къалэхэм утыку къыщрахьащ. УФ-м и театр гъуазджэм зегъэужьыным хуищIа хэлъхьэныгъэм папщIэ театрым и лъабжьэр ди къэралым щызыгъэтIы- лъауэ къалъытэ Волков Фёдор и цIэкIэ екIуэкIа XIX дунейпсо фестивалым КъБР-м и цIыхубэ артисткэ ЖьакIэмыхъу КIунэ УФ-м и Правительствэм и саугъэтыр къыщыхуагъэфэщащ. Къыхэгъэщыпхъэщ, илъэс къэс ирагъэкIуэкI а фестивалым ди лъэпкъ театрыр иджы япэу хэтами, цIыхухэм хуабжьу ягу ирихьу я спектаклхэм зэреплъар.
- Труппэм зыкъыщагъэлъэгъуащ Шэшэным, Адыгейм я лъэпкъ театрхэм, гуащэ театрым «Красная шапочка» таурыхъыр япэу утыку къыщрахьащ.
- ПсапащIэ Iуэхухэми хуэжыджэрщ театрыр — унагъуэ хуэмыщIахэм къыхэкIахэр, сабий унэхэм щапIхэр, зи Iэпкълъэпкъым сэкъат иIэхэр, ветеранхэр, УФСИН-м и лэжьакIуэхэр театрым пщIэншэу щIагъэхьэ. КъыдэкIуэтей щIэблэр театр гъуазджэм дегъэхьэхынымкIи къалэн пыухыкIахэр ялэжь, сабий садхэм, курыт еджапIэхэм щIэсхэр, студентхэр щIэх-щIэхыурэ кърашалIэ.
- Къэбэрдей театрым и утыр нэгъуэщI IуэхуфIхэмкIи гъэнщIауэ щытащ. А псори къэплъытэмэ, жыпIэ хъунущ республикэм и щэнхабзэ дунейм лъэпкъ театрым увыпIэ щхьэхуэ зэрыщиубыдыр, цIыхухэм художественнэ зэхэщIыкI, эстетикэ зыужьыныгъэ егъэгъуэтынымкIэ къалэн инхэр зэрызэфIагъэкIыр.
- 2019 гъэр Театрым и илъэсу ди къэралым щагъэуващ. Дыщогугъ фIы куэд абы къахузэдихьыну, къэралым и лъэныкъуэкIэ ягъуэт гулъытэм, зэхэщIыкIым хэхъуэну.
- Щомахуэ Залинэ.