Шыкъ Астемыр и зи чэзу текIуэныгъэхэр
2016-06-08
- Налшык къалэ и ипподромым иджыблагъэ щызэхэтащ зи чэзу шыгъажэ махуэр. Абы щагъэува саугъэтхэм щIэбэнащ япэу зэхьэзэхуэм къыхыхьэхэри, щIэх-щIэхыурэ утыку къихьэхэри.
- Шыгъажэ махуэр къызэIуахащ Гъунапкъэхъумэхэм я махуэм ирихьэлIэу ягъэува саугъэтыр къэхьыным ехьэлIа къызэдэжэмкIэ. Абы щIэбэнащ «Малкинский» заводым къыщалъхуа, илъэситI зи ныбжь инджылыз-къэбэрдей лъэпкъышхэр. Километр зи кIыхьагъ гъуэгуанэр псом япэу къызэпичащ Шыкъ Астемыр зытеса Резвая шыр.
- Тэрч щIыналъэм и цIэкIэ ягъэува саугъэтыр метр 1500-м щызыIэригъэхьащ ар къихьыну куэдым зыхуагъэфэща, илъэсищ зи ныбжь шыбз Камилэ. Шууей Шыкъ Астемыр къигъэжа шыр «Малкинский» заводым щагъэхъу.
- Совет Союзым и ЛIыхъужь Къуэныкъуей Назир къызэра- лъхурэ илъэси 100 зэрырикъум и щIыхькIэ ягъэува саугъэтыр зыIэригъэхьащ «Малкинский» заводым щагъэхъуа, Шыкъыр зытеса Блэк Джет. Кубокыр текIуам иратащ Къуэныкъуей лъэпкъым и лIыкIуэхэм.
- Метр 1800-рэ зи кIыхьагъ гъуэгуанэм «Кабардино-Балкарская правда» газетыр илъэс 95-рэ зэрырикъум хухаха саугъэтым щхьэкIэ щызэхьэзэхуащ илъэсищ хъу лъэпкъыш къабзэхэр. Зэрыхуагъэфэщауэ, жыджэру пашэныгъэм щIэбэнахэм яхэтащ Сэкрэкхэ я Нартан, Думэным и Чилиндер, Налшык хьэлвэ щащI заводым и Сонар Прадо сымэ. Къызэдэжэр фIы дыдэу къыщIэзыдза Нартан япэ зэритыфар гъуэгуанэм и ныкъуэр къызэпачыхункIэщ. АдэкIэ абы щхьэщыкIыжащ ищхьэкIэ къыщыдгъэлъэгъуа шитIыр. Иужьрей метр 200-м зэуэ зизычыжа Сонар Прадо япэу къэсащ. Ар къигъэжащ мастер-шууей Пэнжокъуэ Рустам.
- Шыгъажэ махуэр зэхуащIыжащ Прохладнэ щIыналъэм и цIэкIэ ягъэува саугъэтыр къэхьыным теухуа къызэдэжэмкIэ. Метр 1200-рэ зи кIыхьагъ гъуэгуанэр япэу къызэпичащ мастер-шууей Къашыргъэ Залым зытеса Сэкрэкхэ яш Спениш Мур.
- КъыкIэлъыкIуэ шыгъажэ ма-
- хуэр мэкъуауэгъуэм и 12-м Налшык ипподромым щызэхэтынущ.
- КЪЭХЪУН Бэч.