Балъкъэр лъэпкъым и щыгъуэ махуэ
2016-03-10
- Политикэ залымыгъэм ихьахэм я фэеплъым и деж гъатхэпэм и 8-м щекIуэкIащ щыгъуэ пэкIу. Ар теухуауэ щытащ балъкъэр лъэпкъым и хэкур зэрырагъэбгынэрэ илъэс 72-рэ зэрырикъум.
- Щыгъуэ пэкIум кърихьэлIат КъБР-м и Правительствэм и Iэтащхьэ Мусуков Алий, КъБР-м и Парламентым и УнафэщI Егоровэ Татьянэ, министрхэр, жылагъуэ лэжьакIуэхэр, дин лэжьакIуэхэр. Политикэ залымыгъэм и зэранкIэ дунейм ехыжахэм папщIэ дыуэ ящIащ. Абы и ужькIэ КъБР-м щэнхабзэмкIэ и министр Къумахуэ Мухьэдин къызэхуэсахэм захуигъэзащ:
- — Илъэс 72-рэ и пэкIэ балъкъэр лъэпкъым зыхищIащ гузэвэгъуэшхуэ. Нобэ мы пэкIум кърихьэлIахэм дигу къыдогъэкIыж хамэщIым зи кхъащхьэ къыщынахэр. абыхэм дахуэвгъэщыгъуэ.
- ПэкIум къекIуэлIахэм удз гъэгъахэр тралъхьащ мемориалымрэ балъкъэр узэщIакIуэ Мечиев Кязим и фэеплъымрэ. Ар зэфIэкIа нэужь, цIыхухэм яунэтIащ зи адэжь лъахэр зрагъэбгына балъкъэрхэм я щхьэ кърикIуахэм ущызыгъэгъуазэ гъэлъэгъуэныгъэ къыщызэIуаха музей-мемориалым.
- Щыгъуэ пэкIум и кIэухым Къэбэрдей-Балъкъэрым и артистхэр а махуэм теухуа усэхэм къеджащ, апхуэдэ нэщхъеягъуэ афIэкIа къэмыгъэхъуным цIыхухэр хуэзыущий уэрэдхэр ягъэзэщIащ.
- ЩОДЖЭН Iэминат.
- Сурэтхэр
- Елъкъэн Артур трихащ.