Мазэ лэжьыгъэр зэхаублэ
2016-02-04
- ЩIалэгъуалэм зыхъумэжыныгъэ, дзэ-хэкупсэ гъэсэныгъэмкIэ я мазэ лэжьыгъэр щIышылэм и 26-м гуфIэгъуэ щытыкIэм иту къыщызэIуахащ Шэджэм ЕтIуанэ къуажэм щыщу Хэку зауэшхуэм хэкIуэдахэм я фэеплъым деж. Шэджэм муниципальнэ щIыналъэм и унафэщIхэр я щIэгъэкъуэну, «ДОСААФ-РОСТО» IуэхущIапIэм и щIыпIэ къудамэм и жэрдэмкIэ, ар къызэрагъэпэщащ.
- ЗэIущIэм хэтащ щIыпIэ властым, гуащIэдэкI гупхэм, жылагъуэ зэгухьэныгъэхэм я лэжьакIуэхэр. Къызэхуэсахэм зыхуагъэзащ КъБР-м и ДОСААФ-м и унафэщIым и къуэдзэ запасым щыIэ полковник МацIыхъу Хъусен, щIыпIэ муниципалитетым и советым и унафэщI Уэдыжь Хьэсанш, ветеранхэм я щIыналъэ организацэм и унафэщI Iэрыпщ Борис. Абыхэм я псалъэм къыхагъэщащ къытщIэхъуэ щIэблэр гъэсэным мыхьэнэшхуэ зэриIэм, хэкум папщIэ зи псэр зыта нэхъыжьыфIхэм я хъыбархэм щыгъуазэу ахэр къызэрыгъэтэджыпхъэм.
- Зауэм хэкIуэдахэр я гум къагъэкIыжу фэеплъ сыным удз гъэгъахэр тралъхьащ.
- А махуэм щIыпIэ еджапIэхэм щыIащ зыхъумэжыныгъэм, дзэ-хэкупсэ гъэсэныгъэм и мазэр къызэрызэIуахым теухуа зэIущIэхэр. Абы ипкъ иткIэ конкурсхэр, лекцэхэр, спорт зэхьэзэхуэхэр Шэджэм щIыналъэм мазэкIэ щекIуэкIынущ.
- КIарэ Элинэ.