НэпкъитIыр зэроубыдыж, е Илъэс куэдкIэ зыпэплъа лъэмыж
2014-04-16
- Ди газетым зэрытетащи, Къэбэрдей-Балъкъэрым и Iэтащхьэм и къалэнхэр пIалъэкIэ зыгъэзащIэ КIуэкIуэ Юрий Бахъсэн районым хыхьэ Къулъкъужын Ищхьэрэ къуажэм гуфIэгъуэ щытыкIэм иту мэлыжьыхьым и 14-м автомобиль лъэмыжыщIэ къыщызэIуихащ. Абы теухуа зэIущIэ гуапэм хэтащ республикэм и Правительствэм щыщхэр, куей администрацэм и унафэщIхэр, къуажэдэсхэр.
- Мы махуэр жылэм и тхыдэм Iуэху дахэу хыхьэнущ. Сыту жыпIэмэ, ар илъэс 32-кIэ зыпэплъа ухуэныгъэщIэщ. Фигу къэдгъэкIыжынщи, 1982 гъэм къуажэкум деж псым лъэмыжыр щытрихри, унагъуэ 60-м щIигъу щхьэхуэ хъуауэ щытащ. Я къарукIэ тралъхьэжыну хэтами, абы пэмылъэщурэ, нобэм къэсащ. Мы гъэм мазаем и 13-м КIуэкIуэ Юрий лэжьыгъэ IуэхукIэ щахуэ- кIуам къулъкъужындэсхэм я гукъеуэр къыхуаIуэтащ. Абы щыгъуэ куэдым я фIэщ хъуакъым мазитI нэхъ дэмыкIыу апхуэдиз илъэскIэ зэжьа лъэмыжым теухуа гуфIэгъуэкIэ жылэр зэхыхьэну. «Ай Би Си Промстрой» компаниер а Iуэхум яужь ихьэри, махуи 10-15-м къриубыдэу нэпкъитIыр зэпащIэжащ.
- Илъэси 100-м щIигъуа, Хэку зауэшхуэм и ветеран къуажэдэс нэхъыжьыфI ПщыхьэщIэ Нащир жылэм дэсхэм къабгъэдэ-кIыу КIуэкIуэ Юрий фIыщIэ хуищIащ, республикэм зегъэужьыным, цIыхухэм я псэукIэр егъэфIэкIуэным гулъытэшхуэ зэрыхуищIыр гуапэ зэращыхъур къыхигъэщащ.
- — ЛъэмыжыщIэм пыщIа Iуэху псори зэфIэзыгъэкIар «Ай Би Си Промстрой» компаниерщ. Ар инкъым, ауэ къуажэдэсхэм я дежкIэ абы и мыхьэнэр къыпхуэмыIуэтэным хуэдизщ. Зэман кIыхькIэ ухуэныгъэщIэм пэплъахэм гупсэхугъуэ зэрагъуэтыжынум шэч хэлъкъым. Нобэ ди нэгу щIэкIыр къэрал-уней зэдэлэжьэныгъэм и фIыгъэщ. А щапхъэфIыр республикэм нэхъ тегушхуауэ къыщагъэсэбэпыну сыщогугъ, — къыхигъэщащ КъБР-м и Iэтащхьэм и къалэнхэр пIалъэкIэ зыгъэзащIэм. — Бизнесыр дакъузэу жаIэу зэхыдох. Абы пэж гуэрхэр хэлъми, езыхэми щрагъэлей, щхьэхуещагъэр къащытекIуэ щыIэщ. Арами, Iуэхур зэIубзу, пэжу зезыхьэхэр, республикэм и сэбэп зыхэлъхэм хьэлэлу телажьэхэр, цIыхухэм я зэIузэпэщ псэукIэр зыфIэлъапIэхэр мащIэкъым. Къулъкъужын Ищхъэрэ, Къулъкъужын Ипщэ къуажэхэм я гъуэгу нэхъыщхьэхэм щыщу километр 20-м нэблагъэм асфальт зэрытралъхьари къэрал-уней зэдэлэжьэныгъэм тещIыхьа программэхэм тетущ. Ари Iуэхушхуэу къызолъытэ. Иджыри зэ къытезгъэзэжынщи, метр 30 хъу лъэмыжыр мыинми, абы зыдэвузэщIыну, гуфIэгъуэ куэд къыфхудэкIуэну сынывохъуэхъу, — захуигъэзащ КIуэкIуэ Юрий къызэхуэсахэм.
- Данэ лентI плъыжьыр зэпаупщIу ухуэныгъэр къызэIуаха нэужь, бысымхэм ящIыгъуу, хьэщIэхэри лъэмыжыщIэм ирикIуащ, и щытыкIэм еплъащ, ухуакIуэхэм фIыщIэ хуащIащ.
- «Ай Би Си Промстрой» компанием и лIыкIуэ Попович Виктор къигъэлъэгъуащ я лэжьыгъэм фейдэуэ къыпэкIуэм и процент 20-м нэблагъэр социальнэ Iуэхухэм, цIыхухэм защIэгъэкъуэным зэрыхалъхьэр, республикэм и унафэщIхэм къагъэув къалэнхэр гъэзэщIэным ухуэныгъэ бизнесыр дяпэкIи хэтыну зэрыхьэзырыр.
- Апхуэдэу КIуэкIуэ Юрий и гуапэу хэтащ Къулъкъужын Ищхъэрэ къуажэм Къып Мухьэмэд и цIэр зезыхьэу дэт гъуазджэхэмкIэ сабий еджапIэр къызэрызэIуахрэ илъэси 10 зэрырикъум хуагъэхьэзыра гуфIэгъуэ Iуэхухэм. Абы и пэ къихуэу, спорт комплексым щыIащ, а махуэм и щIыхькIэ къызэрагъэпэща зэхьэзэхуэм еплъащ.
- КIуэкIуэ Юрий сабий еджапIэм и щыпэкIуэкъым. Япэу щыщыIа мазае лъандэрэ абы къыщыхъуа зэхъуэкIыныгъэхэм зыхигъэгъуэзащ, дяпэкIэ зыхуей-зыхуэфIхэр зригъэщIащ, ныбжьыщIэхэм я зэфIэкIыр зригъэлъэгъуащ. ИужькIэ, къуажэдэсхэм я гъусэу, школым и пщIантIэ хуитым щызэхаша концертым еплъащ, зэхуэсахэм я гуфIэгъуэр ядиIыгъащ.
- — Сабий 300-м нэблагъэ щагъасэ фи еджапIэм «зихуэдэ щыIэкъым» хужыпIэ хъунущ. Ар ныбжьыщIэхэм я творчествэм, я къэухьымрэ я гупсысэмрэ зыщиужь хэщIапIэщ, гъуазджэм и фIыпIэм, абы и «щэху-хэм» я къигъэхъуапIэщ, гъащIэм и IэфIымрэ и лъапIэныгъэмрэ сабийхэм я нэкIэ къыщагъэщI «дунейщ». Фи гъэсэн цIыкIухэм дрогушхуэ. ЕджапIэр нобэ илъэсипщI ирокъу. Ар бжыгъэ дахэщи, фи юбилейм хуэдэ куэд Къэбэрдей-Балъкъэрым щыдгъэлъэпIэну ди гуапэщ. Школым и IэпщIэлъапщIэхэр республикэ, урысей зэпеуэхэм жыджэру зэрыхэтым, увыпIэ лъагэхэр къызэрыщахьым дрогушхуэри, дяпэкIи я зэфIэкIым хагъэхъуэну дыщогугъ, — къыхигъэщащ КIуэкIуэ Юрий.
- Къежьэжын и пэ къихуэу, республикэм и Iэтащхьэм еджапIэм и унафэщI, къызэгъэпэщакIуэ емызэш КIуж Рити, Налшык нэс икIыурэ сабийхэм ядэлажьэ гъэсакIуэхэми, школым и Iуэхур дэзыгъэкIхэми фIыщIэ лей яхуищIащ, дапщэщи зэрызащIигъэкъуэнур яжриIащ, санитар къабзагъэр къызэгъэпэщыным хуэунэтIауэ нэхъ пасэу ищIа пщэрылъхэр зэрагъэзащIэр къипщытащ.
- ХЬЭЖЫКЪАРЭ Алик.