Урысейм щыпсэухэр ябжынущ
2021-02-27
- Урысейм щыпсэухэр бжыным и сайтым хъыбар къызэритамкIэ, Урысей Федерацэм и Правительствэм къэралым исхэр зыхуэдизыр къэлъытэныр 2021 гъэм и фокIадэ мазэм ирагъэкIуэкIыну унафэ къищтащ. Дунейр зэщIэзыщта COVID-19 узыфэр а пIалъэм ирихьэлIэу нэхъ кIэщхъэну, цIыху зэхыхьэри нэхъыбэ хъужыну щогугъ.
- IэщIагъэлIхэм зэрытрагъэчыныхьымкIэ, COVID-19 узыфэм и ягъэкIэ къэралым щыщыIэ хъуа щытыкIэр кIуэ пэтми нэхъ зэтес щохъу, сымаджэхэм я бжыгъэм хощI, узым зэребэнын хуей Iэмалхэр нэхъ нахуэ мэхъу, вакцинэр зэрыхалъхьэну программэр зэIубзщ. КъызэгъэпэщакIуэхэм 2021 гъэм и фокIадэ мазэр «нэплъэжыгъуэу», Iуэхур къыдэхы-ным теухуауэ пIалъэщIэри нэхъ шынагъуэншэу ягъэуващ. Абы къищынэмыщIауэ, абыхэм трагъащIэ мыпхуэдэ щхьэусыгъуэхэми:
- япэрауэ, а Iуэхур 2021 гъэм и фокIадэ мазэм егъэкIуэкIыным Iэмал къыует а лъэхъэнэм ирихьэлIэу кърахьэжьэ статистикэ лэжьыгъэхэр къызэпымыудауэ игъуэм къызэгъэпэщынымкIэ, ипэ ита илъэсхэм къэралми дунейми хэIущIыIу щыхъуа статистикэ бжыгъэхэмрэ иджырей жылэхэтхыкIым къитыну бжыгъэхэмрэ зэзыгъэпщэж мардэхэр нэхъ щызу Iуэхум къыхэлъхьэнымкIэ;
- етIуанэрауэ, Росстатым зэрыжи-IэмкIэ, бжьыхьэм цIыхур и пIэ йотIысхьэжри, къыхэтхыкIыныр нэхъ зэгъэпэща икIи нэхъ тынш мэхъу: зыгъэпсэхуакIуэ щыIахэр я унэ къокIуэлIэж, гъэ еджэгъуэщIэм щIедзэж, къэрал Iуэхутхьэбзэхэр зыгъэзащIэ IуэхущIапIэхэм я лэжьыгъэр зэтеубла мэхъуж;
- ещанэрауэ, а лэжьыгъэм къыхашэну студент щIалэгъуалэм я практикэ лъэхъэнэм хуозэри, еджэныгъэр зэпамыгъэууэ Iуэхум хэтыну Iэмал щыIэ мэхъу;
- еплIанэрауэ, уз зэрыцIалэхэм мащIэу зыщаубгъу зэманщи, цIыхумкIи жылэхэтхыкIыр зи пщэ дэлъхэмкIи нэхъ шынагъуэншэ мэхъу.
- Фигу къэдгъэкIыжынщи, къэралым исхэр бжыныр дунейм къыщекIуэкI узыфэм и ягъэкIэ ягъэIэпхъуэн хуей хъуащ Америкэм и Штат Зэгуэтхэми, Аргентинэми, Бразилиеми, Эквадорми, Къыргъызми, нэгъуэщI къэрал зыбжанэми.
- Къыхэгъэщын хуейщ, урысейпсо жылэхэтхыкIыр мы гъэм бжыгъэрылъанэ жыпхъэм (цифровой формат) иту зэрекIуэкIынур. Абы фIэкIыжмэ, «Къэрал Iуэхутхьэбзэхэр» зи фIэщыгъэ интернет-утыкум и напэкIуэцIыр къызэIупхыу абдеж ит упщIэхэми жэуап ептыну Iэмал щыIэнущ. Унагъуэхэр къыщызэхакIухькIэ, цIыхухэр къыхэзытхыкIхэм планшет яIыгъынущ, упщIэхэр зэрыт программэ пыухыкIам тету. Абы зэ зыкъыщызыгъэлъэгъуам етIуанэу зыхитхэжын хузэфIэкIынукъым.
- ШУРДЫМ Динэ.