Гъэ еджэгъуэщIэм зэса мардэм тету щыщIадзэжыну я мурадщ Къэбэрдей-Балъкъэрым
2020-08-08
- Къэбэрдей-Балъкъэрым мы зэманым щыхуэкIуащ коронавирусым и зэранкIэ ягъэувауэ щыта мардэхэм къытекIыжыным теухуа ещанэ Iыхьэм икIи егъэджэныгъэ IуэхущIапIэ псоми Iэмал ягъуэтащ я лэжьыгъэм пащэжыну. Абы ипкъ иткIэ республикэм щамурадщ 2020 — 2021 гъэ еджэгъуэщIэр зэса щIыкIэм тету, сабийхэр школхэм екIуалIэу, щIадзэжыну.
- УФ-м цIыхухэм щIэныгъэ егъэгъуэтынымкIэ и министр Кравцов Сергей нэхъапэIуэкIэ зэрыжиIамкIэ, еджапIэм емыкIуалIэу ныбжьыщIэхэр егъэджэн Iэмалым урысей школхэм щыхуэкIуэнукъым, гъэ еджэгъуэщIэр фокIадэм и 1-м щIадзэжынущ, илъэс кIуахэми щыIа къызэрыгуэкI мардэм тету.
- КъБР-м ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министерствэм къызэрилъытэмкIэ, республикэм и школхэм я процент 99-р еджэгъуэ лъэхъэнэщIэм хуэхьэзырщ. ФокIадэм и 1-м и бжэхэр щIэблэм яхузэIуихынущ Налшык къалэм щащIа курыт школыщIэм, еджакIуэ 1224-м ятещIыхьам. Илъэсыр щиухым ирихьэлIэу щIыналъэм и кIэм щынагъэсынущ школитI — ныбжьыщIэ 500 щIэхуэну Шэджэм къалэм щащIымрэ Прохладнэ районым щыщ Солдатскэ жылэм сабий 250-м яхухэхауэ щаухуэмрэ. Апхуэдэу цIыкIу 940-рэ зыщIэхуэну яслъэ ухуэныгъэу 21-рэ.
- Министерствэм къызэритымкIэ, республикэм мы зэманым щолажьэ курыт еджапIэу 265-рэ.
- КъБР-м и Iэтащхьэмрэ Правительствэмрэ я пресс-IуэхущIапIэ.