САЛИМЭ
2020-08-06
- Ди республикэм и жэмышхэм лIэщIыгъуэ блэкIам и тхущI гъэхэм зэхаублауэ щыта социалист зэхьэзэхуэм куэдым я цIэр фIыкIэ игъэIуащ. Абыхэм ящыщщ зи гъащIэ псор цIыхугъэ лъагэрэ лэжьыгъэшхуэкIэ зыгъэнщIа, зыпэрыта IэнатIэм зегъэужьыным къарууэ иIэр езыта Пащты Салимэ Мэзан и пхъур.
- 1930 гъэм зи ныбжьыр илъэс 30 ирикъуа Салимэ хыхьащ езыр зыщыщ Куба къуажэм а лъэхъэнэм щызэхаша колхозым икIи абы щыгъуэ къыхихауэ щыта жэмыш IэщIагъэм хуэпэжу и гъащIэ псом къекIуэкIащ.
- Зи щхьэгъусэр 1943 гъэм Харьков деж щыхэкIуэда бзылъхугъэм и бгыр щIикъузэри, я къуэ закъуэр зэрипIыжыным, и Iуэху Iыхьэ зэрищIэным и акъыл триухуащ. И IэнатIэм здыпэрытым, Пащты Салимэ 1958 гъэм жэрдэм къыхилъхьащ, Сталинград областым и Iэщыхъуэхэм я щапхъэм тету, жэмым хуэзэу махуэм шэ пут къыщIашыну. Апхуэдэм зезыпщытыфынур зи къарум щыгугъыж, зи IэщIагъэм хуэIэижь, Iуэхум фIыуэ хэзыщIыкI гумызагъэхэрат. Пащты Салимэ а илъэс дыдэм зы жэмым хуэзэу килограмм 6035-рэ, къыкIэлъыкIуэ гъэм килограмм 6329-рэ къишащ. КъызэрыгуэкI къуажэдэс цIыхубзым дежкIэ ар ехъулIэныгъэшхуэт. Салимэ и жэрдэмыщIэр республикэм и Iэщыхъуэхэм гъуазэ яхуэхъуащ. ИкIи, куэд дэмыкIыу, жэмыш 40-м нэблагъэм зы илъэсым хуэзэу зы жэмым къыщIашыр килограмм 4000-м нагъэсащ.
- Салимэ 1960 гъэм гъатхэпэм и 7-м, СССР-м и Со-вет Нэхъыщхьэм и Президиумым и УнафэкIэ, «Социалист Лэжьыгъэм и ЛIыхъужь» цIэ лъапIэр къыфIащащ, къэралым и нагъыщэ нэхъыщхьэхэр — Ленин орденымрэ «Гъубжэрэ Уадэрэ» дыщэ медалымрэ Кремлым къыщратыжащ, къыщынэмыщIауэ, «ГуащIэдэкIым и Бэракъ Плъыжь» орденыр, медалхэр, щIыхь тхылъхэр къыхуагъэфэщащ, и цIэр щалъхуа къуажэм и уэрамхэм ящыщ зым зэрехьэ.
- КЪУМАХУЭ Аслъэн.