Нобэрэ пщэдейрэ
2020-06-04
- Мэкъуауэгъуэм и 4, махуэку
- Бийр къащытеуам хэкIуэда сабийхэм я дунейпсо махуэщ
- Ингуш Республикэр къыщызэрагъэпэща махуэщ
- Хьэлъэ къызэраIэт краным ирилажьэм и махуэщ
- Къэзахъстан Республикэм и къэрал дамыгъэхэм я махуэщ
- Эстонием щагъэлъапIэ я къэрал ныпым и махуэр
- Финляндием зыхъумэжынымкIэ и къарухэм я махуэщ
- Молдавием и банк лэжьакIуэм и махуэщ
- 1800 гъэм Вашингтон дэт Унэ Хужьыр ухуэныр яухащ. Куэд дэмыкIыу абы Iэпхъуауэ щытащ къэралым и президент Адамс Джонрэ и щхьэгъусэмрэ.
- 1897 гъэм Петербург ухуэн щыщIадзащ «Аврора» кхъухь цIэрыIуэр.
- 1856 гъэм Третьяковскэ галереер къызэгъэпэщыным теухуа унафэ къащтащ.
- 1922 гъэм «Крокодил» журналым и япэ къыдэкIыгъуэр дунейм къытехьащ.
- 1940 гъэм Москва «Динамо» стадионыр къыщызэIуахащ.
- 1943 гъэм Налшык щекIуэкIащ фашистхэм я бийуэ республикэм и цIыхубзхэм къызэрагъэпэща пэкIур.
- 1962 гъэм СССР-м япэу щагъэлъэгъуащ «Фитиль» киножурналыр. Къэралым щыцIэрыIуэ дыдэ хъуауэ щыта а нэтыным и редактор нэхъыщхьэр Михалков Сергейт.
- Хоккеист, СССР-м и щIыхь зиIэ и тренер, зи унафэщIу щыта ЦСКА командэм хэту Совет Союзым 12-рэ и чемпион, щэнейрэ Олимп, 8-рэ дунейпсо чемпион хъуа Тихонов Виктор къызэралъхурэ илъэс 90 ирокъу.
- Америкэм щыщ киноактрисэ цIэрыIуэ, саугъэт куэдым я лауреат, псапащIэ Джоли Анджелинэ и ныбжьыр илъэс 45-рэ ирокъу.
- Урысей биатлонист, Олимп Джэгухэм тIэунейрэ я чемпион хъуа Устюгов Евгений и ныбжьыр илъэс 35-рэ ирокъу.
- Дунейм и щытыкIэнур
- «pogoda.yandex.ru» сайтым зэритымкIэ, Налшык пшэр техьэ-текIыу щыщытынущ, пIалъэ-пIалъэкIэрэ уэшх къыщешхынущ. Хуабэр махуэм градус 20 — 21-рэ, жэщым градус 15 — 16 щыхъунущ.
- Мэкъуауэгъуэм и 5, мэрем
- Дыкъэзыухъуреихь щIыуэпсым и дунейпсо махуэщ
- Хабзэм ебакъуэу бдзэжьей къэубыдыным, ар щэным ебэныным и дунейпсо махуэщ
- Урысеймрэ Къэзахъстанымрэ щагъэлъапIэ Экологым и махуэр
- Дание пащтыхьыгъуэм и конституцэм и махуэщ
- 1706 гъэм Москва къыщызэIуахащ дзэ сымаджэщ (иджы — Бурденкэ Н. Н. и цIэр зезыхьэ дзэ клиникэ госпиталь нэхъыщхьэрщ).
- 1783 гъэм Франджым щыщ Монгольфье зэкъуэшхэу Жозеф-Мишелрэ Жак-Этьеннрэ дунейм щыяпэу уэгум ираутIыпщхьащ бахъэкIэ лажьэ аэростатыр. ЦIыхубэм илъэсищэ дэкIыжа иужькIэ уэгум щыпхаша гъуэгум и лъагъуэр къахузэIузыхар ахэрщ.
- 1881 гъэм хирургхэм я урысей зэгухьэныгъэр къызэрагъэпэщащ.
- 1945 гъэм Берлин Iэ щытрадзащ Германиер зэрыхагъэщIамкIэ икIи СССР-м, США-м, Инджылызым, Франджым я правительствэхэм Германием и власть нэхъыщхьэм и къалэнхэр зэрагъэзэщIэнум теухуа декларацэм. А къэралхэм я дзэзешэхэу Жуков Георгий, Эйзенхауэр Дуайт, Монтгомери Бернард, Латр де Тассиньи сымэщ абы зи Iэ щIэлъыр.
- 1954 гъэм Москва Эстрадэм и театр къыщызэIуахащ.
- 1967 гъэм КъуэкIыпIэ Гъунэгъум щыщIидзащ хьэрып-израиль зауэм. Ар тхыдэм хыхьащ Махуих зауэ цIэр иIэу — Израилыр Мысырым, Иорданием, Сирием ятеуат.
- 1981 гъэм США-м узыфэхэм якIэлъыплъынымкIэ и центрым и щIэныгъэлIхэм узыфэщIэ — СПИД зыфIащар — къахутащ.
- Журналист, тхакIуэ, КъБР-м щэнхабзэмкIэ щIыхь зиIэ и лэжьакIуэ Бекъан Чыланий къызэралъхурэ илъэс 94-рэ ирокъу.
- Адыгей усакIуэ Хъунэгу Нурет и ныбжьыр илъэс 90 ирокъу.
- УФ-м щIыхь зиIэ и мелиоратор Мамхэгъ Алексей и ныбжьыр илъэс 81-рэ ирокъу.
- Польшэм щыщ актрисэ цIэрыIуэ, ди къэралым щытраха фильм куэдми щыджэгуа Брыльскэ Барбарэ и ныбжьыр илъэс 79-рэ ирокъу.
- КъБР-м и цIыхубэ усакIуэ, публицист Бещтокъуэ Хьэбас и ныбжьыр илъэс 77-рэ ирокъу.
- Радиожурналист Къудей Лидэ къыщалъхуа махуэщ.
- УФ-м спортымкIэ щIыхь зиIэ и мастер, псы есынымкIэ тренер, Урысей Федерацэм ЛэжьыгъэмкIэ и ЛIыхъужь Покровская Татьянэ и ныбжьыр илъэс 70 ирокъу.
- Урысей тхакIуэ, философ, МКъУ-м и профессор, телевиденэм «ЩIалэ, пщащэ Iущ цIыкIухэр» нэтын цIэрыIуэр щезыгъэкIуэкI Вяземский Юрий и ныбжьыр илъэс 69-рэ ирокъу.
- Шэрджэс еджагъэшхуэ, мэкъумэш щIэныгъэхэм я доктор Мамбэт Мурадин и ныбжьыр илъэс 60 ирокъу.
- Экономикэ щIэныгъэхэм я доктор, КъБКъМУ-м и профессор ФиIэпщэ Владимир и ныбжьыр илъэс 53-рэ ирокъу.
- Теленэтынхэр езыгъэкIуэкI, «Япэ каналым» сабийхэм папщIэ, апхуэдэуи нэгузыужь нэтынхэр зыгъэхьэзыр и IэнатIэм и унафэщI Пельш Валдис и ныбжьыр илъэс 53-рэ ирокъу.
- Урысей фигуристкэ, Олимп Джэгухэм я чемпионкэ Липницкая Юлие и ныбжьыр илъэс 22-рэ ирокъу.
- Дунейм и щытыкIэнур
- «pogoda.yandex.ru» сайтым зэритымкIэ, Налшык пшэр техьэ-текIыу щыщытынущ, пIалъэ-пIалъэкIэрэ уэшх къыщешхынущ. Хуабэр махуэм градус 20 — 21-рэ, жэщым градус 12 — 13 щыхъунущ.