Лъэпкъ усыгъэм и дыгъэ
2020-03-19
- Тэрч щIыналъэм хыхьэ Новэ-Хьэмидей къуажэм дэт курыт еджапIэм адыгэ литературэм и классик, лъэпкъ усыгъэм и лъагъуэр пхызыша ЩоджэнцIыкIу Алий къызэралъхурэ мы гъэм илъэси 120-рэ зэрырикъум и щIыхькIэ «Адыгэ усыгъэм и дыгъэ» фIэщыгъэр иIэу зэхыхьэ гуапэ щекIуэкIащ.
- IуэхущIапIэм яхуеблэгъат Кэнжэ къуажэм дэт ЩэнхабзэмкIэ унэм и лэжьакIуэ Къанкъул Ислъам, киномрэ театрымрэ я джэгуакIуэ Щоджэн Алим, Тэрч районым егъэджэныгъэмкIэ и управленэм, щIыналъэм щыIэ жылагъуэ зэгухьэныгъэхэм я лIыкIуэхэр.
- Махуэшхуэм и щIыхькIэ ягъэхьэзыра программэм тету хьэщIэхэр япэщIыкIэ ирагъэплъащ ЩоджэнцIыкIу Алий и гъащIэмрэ и творчествэмрэ теухуауэ пэIущIэ пэшым къыщызэрагъэпэща гъэлъэгъуэныгъэм.
- КъыкIэлъыкIуэу ахэр ирагъэблэгъащ адыгэбзэмрэ литературэмкIэ егъэджакIуэ Балъкъэр Жаннэ е 8-нэ классым щигъэхьэзы-ра ЩоджэнцIыкIу Алий и «Нанэ» усэмкIэ дерс зэIухам. ТемэщIэм хыхьэн и пэ къихуэу еджакIуэхэм утыку кърахьащ нэхъапэкIэ тхакIуэм теухуауэ зэхагъэува доклад кIэщIхэр, Алий и сурэтхэр щызэхуахьэса альбомыр. «Хьэжыгъэ пут закъуэ» рассказым щыщ теплъэгъуэ цIыкIуи ягъэуват. ИужькIэ Жаннэ темэщIэм хишащ пэшым щIэсхэр. ЩоджэнцIыкIу Алий «Нанэ» усэр щитха щIыпIэр, ар дунейм къытехьэным щхьэусыгъуэ хуэхъуар, еджакIуэхэм а тхыгъэр зэрызыхащIэн хуей щIыкIэ-хэм яхутепсэлъыхьри, гъэхуауэ езыри еджакIуэхэри къеджащ. ЕгъэджакIуэм жиIэу хъуар IупщIу уи нэгу къыщIэзыгъэувэ теплъэхэри дерсым щагъэлъагъуэрт.
- Курыт еджапIэм и унафэщIым гъэсэныгъэ IуэхухэмкIэ и къуэдзэ Ныбэжь Дианэ усакIуэ уахътыншэм и щIыхькIэ Къанкъул Ислъам триха «ЛIэгъуэджэ» кинофильмым зэIущIэм кърихьэлIахэр иужькIэ иригъэплъащ. Ар зытеухуар ЩоджэнцIыкIу Алий и гъащIэм и иужьрей махуэхэрт. Фильмым еплъкIэрэ еджакIуэхэр гупсысэ куум зэрыхыхьар нэрылъагъут. Тхылъхэм иту еджа фIэкIа нэгъуэщIу ямыцIыху усакIуэм и гъащIэм тращIыкIа теплъэгъуэхэм я нэхъ гу быдэми и нэпс къригъакIуэрт.
- Зэхыхьэм и кIэух хъуащ хьэщIэхэри школакIуэхэри щIэсу екIуэкIа псалъэмакъыр. НэхъапэкIэ зэплъа теплъэгъуэм щыджэгуа Къанкъул Ислъамрэ Що- джэн Алимрэ яхуэгъэзауэ еджакIуэхэм къалъыкъуэкIа упщIэхэм жэуап иратащ.
- ХЬЭРЭДУРЭ Аллэ.