Дыщэ медалу 16
2019-04-09
- Мы махуэхэм Къэрэшей-Шэрджэсым и къалащхьэ Черкесск къалэм щекIуэкIащ тхэквондомкIэ Кавказ Ищхъэрэ щIыналъэм и зэпеуэшхуэ.
- ФIым я фIыжу абы зыкъыщагъэлъэгъуащ икIи медаль зэмылIэужьыгъуэу 50 къыщахьащ Къэбэрдей-Балъкъэрым и спортсменхэм. Черкесск къалэм и «Юбилейнэ» спорт IуэхущIапIэм балигъхэм я чемпионатрэ щIалэгъуалэм я зэпеуэрэ щекIуэкIати, абыхэм я зэфIэкI щагъэлъэгъуащ СКФО-м и щIыналъэ псоми къикIа спортсмен 300-м. «Массоги» (спарринг) лIэужьыгъуэмкIэ балигъхэм я зэпеуэм бжьыпэр щаубыдащ Къурашэ Фаридэрэ (кг 76-рэ) Абазэ Азэмэтрэ (кг 82-рэ). ЩIалэгъуалэм я деж а лIэужьыгъуэ дыдэм щытекIуащ Исакъ Амиран (кг 40), Къалэ Амир (кг 45-рэ), Лобанов Максим (кг 50), Апхуд Тимур (кг 58-рэ), «ПОИНСТОЛ» Iыхьэм пашэныгъэр щаубыдащ Исакъ Амиран, Лобанов Максим, Бетыгъуэн Iэдэм, Апхуд Тимур.
- ЩIалэгъуалэ гупым хэтхэм мы зэхьэзэхуэм медалу 30 къыщахьащ. Абы щыщу 16-р-дыщэщ, 9-р дыжьынщ, 5-р домбеякъщ. Апхуэдэ лъагапIэм тхэнквондомкIэ нэса ди спортсменхэр ягъэсащ Бэлахъуэ Эльдаррэ Абазэ Азэмэтрэ.
- Шэрэдж Дисэ.