IэнатIэ гугъу
2019-03-28
- Урысей гвардием Къэбэрдей-Балъкъэр Республикэм щиIэ къудамэм и унафэщI полицэм и полковник Васильев Сергей я лэжьыгъэм щигъэгъуэзащ журналистхэр. ЗэIущIэр къызэрагъэпэщат УФ-м и Лъэпкъ гвардием и махуэм ирихьэлIэу.
- Васильевым жиIащ нэхъыщхьэ дыдэу я нэIэ зытетыр республикэм и шынагъуэншагъэр къызэгъэпэщыныр, жылагъуэ хабзэр хъумэныр, къызэрымыкIуэ щытыкIэхэр, Iуэху пIащIэгъуэхэр къыщыкъуэкIам деж лэжьыгъэр зэщIыгъуу къызэрагъэпэщыныр зэрыарар. Апхуэдэуи къэрал IуэхущIапIэ нэхъыщхьэхэр, цIыхухэм я мылъкур хъумэнри яубзэху.
- — 2019 гъэр къызэрихьэрэ СОБР-мрэ ОМОН-мрэ я подразделенэ хэхахэм, нэгъуэщI хабзэхъумэ IэнатIэхэр я гъусэу, цIыху мин 20-м щIигъурэ автотранспорт мин 16-рэ къапщытащ. ЩIэпхъаджагъэ ялэжьауэ шэч зыхуащI цIыху 50, административнэ хабзэхэр къызэпызыуда цIыху 14 яубыдащ. КъищынэмыщIауэ, хабзэм къемызэгъыу ящэ фадэ птулъкIэ 800-м щIигъу къытрахащ, этил спирт зыхэту — литр мин 18, кIэрахъуэу 8, къауэ пкъыгъуэхэр зыхэлъу миным щIигъу, — жиIащ Васильевым.
- Налшык къалэм и УВО-м и унафэщI полицэм и полковник Эндреев Марат жиIащ ведомствэм щIэмыт хъумакIуэхэм IуэхущIапIэ мини 4-м щIигъу зэрахъумэр. Абыхэм ящыщу 24-м федеральнэ мыхьэнэ яIэщ. IуэхущIапIэ 13-р Лъэпкъ гвардием и дзэхэм яхъумэн хуейщ. Абыхэм яхохьэ гидроэлектростанци 3, аэропорэр, Бахъсэн абсерваторэр, Iэщэ зыщэ IуэхущIапIэхэм я пэши 8. Къэпсэлъам зэрыжиIамкIэ, нэгъаби хуэдэу, мы гъэми УВО-м и къудамэхэм яхъумэ IуэхущIапIэхэм зыри щрагъэдыгъуакъым.
- Лицензэ тынымкIэ хуит зыщI центрым (ЦЛЛР) и лэжьыгъэм журналистхэр хигъэгъуэзащ IуэхущIапIэм и унафэщI полицэм и подполковник ХьэщIэмыз Заурбэч. Абы зэрыжиIамкIэ, республикэм Iэщэ зиIэ цIыху мин 22-м нэблагъэ исщ, лицензэу ятар мин 36-м ноблагъэ. 2019 гъэр къызэрихьэрэ Iэщэм теухуауэ хабзэр къызэрызэпаудам и административнэ протоколу 230-рэ ятхащ, Iэщэу 146-рэ къыIахащ.
- ЗэIущIэм къыщыхагъэщащ Iэщэ и унэ изыгъэлъыну хуэмейм ар къэралым зэрырищэжыфынур, КъБР-м и Правительствэм абы ахъшэ зэрыхухихыр. Апхуэдэу нэгъабэ Iэщэ 50-м щIигъу къыхахыжащ, нэхъыбэр я нэхъыжьхэм къащIэна, зыщIыпIи къыщымыгъэлъэгъуат. КъБР-м я нэIэ щытетщ Iэщэ миным нэблагъэ щахъумэ IуэхущIапIэ 45-м, Iэщэ зыщэ IуэхущIапIи 4-м, хъумакIуэхэр щагъасэ IэнатIи 6-м, уней хъумакIуэ зэгухьэныгъэу 51-м.
- КЪАНЩАУЭ Мэлычыпхъу.