КIуэкIуэ Казбек хэтащ «IэщIагъэм хуэIэзэ ныбжьыщIэхэр» III щIыналъэ чемпионатыр щызэхуащIыжым
2019-03-05
- Бэрбэч Хь. М. и цIэр зезыхьэ Къэбэрдей-Балъкъэр къэрал университетым щызэхуащIыжащ «IэщIагъэм хуэIэзэ ныбжьыщIэхэр» III щIыналъэ чемпионатыр. Абы ирихьэлIащ КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ К. В., КъБР-м къегъэщIылIа федеральнэ инспектор нэхъыщхьэ Ткачёв Е. А., КъБР-м и Парламентым, КъБР-м и Правительствэм, министерствэхэмрэ ведомствэхэмрэ я унафэщIхэр.
- Конкурсым и республикэ Iыхьэм и финалым нэсахэмрэ текIуахэмрэ КIуэкIуэ Казбек ягу къигъэкIыжащ «IэщIагъэм хуэIэзэ ныбжьыщIэхэр» зэщIэхъееныгъэм мыхьэнэшхуэ зэриIэр, рабочэ IэщIагъэхэм яIэ пщIэр къэIэтыным, IэщIагъэлI нэсхэр гъэхьэзырыным хуэгъэзауэ абы зэпымыууэ зегъэужьын зэрыхуейм Урысейм и Президент Путин Владимир гулъытэшхуэ зэрыхуищIыр икIи абы Федеральнэ Зэхуэсым Зэрызыхуигъэзам а Iуэхур къызэрыхигъэщар.
- ИкъукIэ гуапэщ, жиIащ республикэм и унафэщIым, а зэщIэхъееныгъэм Къэбэрдей-Балъкъэрым гъэ къэс нэхъ лъэщу зэрыщызыщиубгъур. Иджырей щIыналъэ чемпионатыр ирагъэкIуэкIащ нэхъ щIэупщIэ зиIэ IэщIагъэу 18 хиубыдэу. Абыхэм ныбжьыщIэхэри, IэщIагъэлI щIалэхэри, куэд щIауэ лажьэ педагогхэри хэтащ.
- «Ди щIалэгъуалэм зэфIэкI, егугъуныгъэ, щIэныгъэ зэрабгъэдэлъырщ республикэм и ефIэкIыныгъэ нэхъыщхьэр. Дэ ар къыдгуроIуэ икIи щIалэгъуалэм зегъэужьыным хуэунэтIа проектхэмрэ конкурсхэмрэ нэхъыбэ тщIы зэпыту едгъэкIуэкIынущ. Къапщтэмэ, «Егъэджэныгъэ» лъэпкъ проектыр гъэзэщIэным хиубыдэу къызэрагъэпэщынущ IэщIагъэхэм щыхуагъэхьэзыр центр, апхуэдэу иджыпсту зэманым къигъэувхэм езэгъ лъэщапIэ щэ ныкъуэм щIигъу. Республикэм и щIалэгъуалэр къыхудоджэ апхуэдэ Iэмалхэр нэхъ тегушхуауэ икIи жыджэру къагъэсэбэпыну, я мурадхэмрэ плъапIэхэмрэ зрагъэхъулIэну, дыщалъхуа Къэбэрдей-Балъкъэрым, ди Хэкум сэбэпынагъ къыхуахьыну», — жиIащ КъБР-м и УнафэщIым.
- Апхуэдэу адэкIи зрагъэужьынущ, къигъэлъэгъуащ КIуэкIуэ Казбек, сэбэпынагъышхуэ зиIэ проектхэм, «КъэкIуэнум и билет», «Си япэ бизнес», «Сэ сыIэщIагъэлIщ», «Урысейм и цIыху пэрытхэр», «ЛъагапIэщIэ» жыхуэтIэхэм.
- ЩIыналъэм и унафэщIым фIыщIэ псалъэхэмкIэ захуигъэзащ чемпионатыр къызэзыгъэпэщахэм, экспертхэм, зэпеуэм хэтахэм я гъэсакIуэхэм. Мы конкурсым къыщахьа ехъулIэныгъэ инхэр зи фIыщIэ нэхъыщхьэр ахэрщ.
- ЩIыналъэ чемпионатыр щызэхуащIыжым жаIащ зи IэщIагъэм хуэIэзэхэм я 45-нэ дунейпсо зэпеуэр 2019 гъэм Къэзан зэрыщекIуэкIынур.
- КъБР-м и Iэтащхьэмрэ Правительствэмрэ я пресс-IуэхущIапIэ.