Сурэт щIэщыгъуэхэр
2019-03-05
- СурэтыщI гъуазджэхэмкIэ музейм щагъэлъагъуэ ХудожествэхэмкIэ Урысей академием щIыхь зиIэ и академик, художник Рубец Александр и лэжьыгъэхэр. Выставкэр къызэрызэIуахым траухуа зэхыхьэр иригъэкIуэкIащ музейм и унафэщI Ремхен Еленэ.
-
Рубец Александр
Музейм и пэшищми утыку къыщрахьа лэжьыгъэхэм къапкърыкI дахагъэр, нэм къыдэкIуэу, псэкIи зэрызыхэпщIэм урегъэгупсыс гъуазджэм и къарур зэрыгъунапкъэншэм, художникхэм дуней лъагъукIэ щхьэхуэ зэраIэм, сурэтыщI гъуазджэм и щэхухэм узэрыхашэфым. Абыхэм къохъулIэ десэжауэ махуэ къэс ди нэгу щIэкI щIыуэпсым, щIыпIэ дахэхэм нэгъуэщIынэкIэ драгъэплъын.
- — Рубец Александр ящыщщ зи хъэтI зиIэж, зи лэжьыгъэ хьэлэмэтхэр нэгъуэщIхэм я IэдакъэщIэкIхэм занщIэу къахэпцIыхукI сурэтыщI IэкIуэлъакIуэхэм, — жиIащ КъБР-м щэнхабзэмкIэ и министр Къумахуэ Мухьэдин выставкэр къыщызэIуихым.
- УФ-м и СурэтыщIхэм я зэгухьэныгъэм и Къэбэрдей-Балъкъэр правленэм и унафэщI Темыркъан Геннадий и псалъэм къыхигъэщащ Рубец Александр цIыхухэр фIыуэ зэрилъагъур икIи ахэр зымащIэкIэ нэхъ мыхъуми насыпыфIэ зэрищIыным хущIэкъуу, езым илъагъу дахагъэмрэ хуабагъэмкIэ зэрадэгуашэр.
- УФ-м щIыхь зиIэ и художник, КъБР-м и цIыхубэ сурэтыщI, ЩIДАА-м и академик КIыщ Мухьэдин и гуапэу жиIащ илъэс куэд хъуауэ ицIыху и лэжьэгъу Рубец Александр ХудожествэхэмкIэ Урысей академием хэтхэм фIыуэ къызэралъагъумрэ пщIэ лъагэ къызэрыхуащIымрэ, ар зэфIэкI нэхъ зиIэ сурэтыщIхэм зэращыщыр.
- Рубец Александр фIыщIэ яхуищIащ гъэлъэгъуэныгъэр къызэгъэпэщыныр зи жэрдэм, УФ-м и СурэтыщIхэм я зэгухьэныгъэм и республикэ къудамэм, музейм и лэжьакIуэхэмрэ абы кърихьэлIахэмрэ. Абы къыхигъэщащ Кавказым и щIыпIэ дахэхэр, абы щыпсэухэр, плъыфэ щхъуэкIэплъыкIэхэр, дахагъэр фIыуэ зэрилъагъур икIи ахэр утыку кърихьа и лэжьыгъэхэм къызэрыщигъэлъэгъуар. Выставкэм къекIуэлIащ сурэтыщIым и благъэхэр, ныбжьэгъухэр, гъуазджэм дихьэххэр.
- Гу зылъытапхъэ: Рубец Александр Белоруссием щыIэ Гроднэ къалэм къыщалъхуащ. ГъуазджэхэмкIэ республикэ сабий интернатым, Санкт-Петербург и Художественнэ училищэм щеджащ. Урысейпсо, дунейпсо художественнэ выставкэхэм и лэжьыгъэхэр утыку къыщрихьащ. И сурэт куэд щахъумэ иджырей гъуазджэхэмкIэ Москва и къэрал музейм, Дон Iус Ростов, Грознэ къалэхэм я художественнэ музейхэм, Дербент щыIэ «Нарын-Кала» къэрал музей-быдапIэм, Ставрополь крайм и музейхэм. Дамыгъэ лъапIэхэр мызэ-мытIэу къыхуагъэфэщащ, УФ-м и СурэтыщIхэм я зэгухьэныгъэм, ХудожествэхэмкIэ Урысей Академием къабгъэдэкI дыщэ медалхэр щIыгъуу. Мы зэманым Рубец Александр Псыхуабэ къалэм щолажьэ.
- ТЕКIУЖЬ Заретэ.
- Сурэтхэр Къарей Элинэ трихащ.