ЗэрытегъакIуэхэркъым
2019-03-05
- Урысей Федерацэм футболымкIэ и етIуанэ дивизионым и «Ипщэ» гупым 2018 — 2019 гъэхэм щекIуэкI зэхьэзэхуэм щIидзэжыным махуэ бжыгъэ иIэжу аращ. Абы ерыщу зыхуэзыгъэхьэзыр «Спартак-Налшыкым» зэныбжьэгъугъэ зэIущIитI зэкIэлъхьэужьу Нартсанэ (Кисловодск) къыщрихьэлIащ.
- Мазаем и 24-м ди щIалэхэм хьэрхуэрэгъу къахуэхъуащ Псыхуабэ и «Мэшыкъуэ-КМВ»-р. ЗэIущIэр удэзыхьэхыу екIуэкIащ. Псыхуабэдэсхэм япэу бжыгъэр къызэIуахащ: абыхэм яхэт ди лъахэгъу КIыщ Залым сэмэгурабгъумкIэ кIуэцIрыкIри, Iэзэу топыр къыхитащ икIи лъэщу еуэри, Соловьёв Михаил и командэр япэ иригъэщащ.
- «Спартак-Налшыкыр» абы къигъэдзыхакъым. Ар нэхъ ерыщыжу ебгъэрыкIуэ хъуащ икIи апхуэдэхэм ящыщ зым «Мэшыкъуэ-КМВ»-м и гъуащхьэхъумэхэм футбол хабзэр я гъуэм пэмыжыжьэу къызэпаудащ. Пенальти! Ар Iэзэу игъэзэщIащ Бацэ Къантемыр.
- Джэгур иухыхукIэ бжыгъэм зихъуэжакъым икIи зэрытемыгъэкIуауэ, 1:1-уэ, командэхэр зэбгъэдэкIыжащ.
- КъыкIэлъыкIуэу, мазаем и 25-м, «Спартак-Налшыкыр» IущIащ Мэхъэчкъалэ и «Легион-Динамо»-м. Махуитху ипэкIи хуэдэу, абыхэм я зэпэщIэтыныгъэр хэт нэхъ лъэщми зэхамыгъэкIауэ иухащ. Пэжщ, иджы зым адрейм топ худигъэкIыфакъым. Япэр 1:1-уэ зэфIэкIат.
- Фигу къэдгъэкIыжынщи, Урысей Федерацэм футболымкIэ и етIуанэ дивизионым и «Ипщэ» гупым 2018-2019 гъэхэм щекIуэкI зэхьэзэхуэм гъатхэпэм и 16-м пащэжынущ. А махуэм зэрызигъэпсэхум къыхэкIыу «Спартак-Налшыкыр» зэпеуэм щыхыхьэжынур тхьэмахуэкIэ нэхъ кIасэущ. Гъатхэпэм и 23-м Къэбэрдей-Балъкъэрым и къалащхьэм абы къыщригъэблэгъэнущ «Краснодар-3» командэр.
-
ХЬЭТАУ Ислъам.