НыбжьыщIэхэм паспортхэр иратащ
2018-07-05
- ЩIалэгъуалэм я махуэр щагъэлъапIэм Урысей МВД-м и «Аруан» къудамэм щекIуэкIащ Урысей Федерацэм и цIыхум и паспортыр щрата Iуэху гуапэ.
- ЗэIущIэм кърагъэблэгъат илъэс 14 ирикъуа ныбжьыщIих, абыхэм я Iыхьлыхэр, Аруан район администрацэм и лIыкIуэхэу Iэтащхьэм и къуэдзэ Атэлыкъ ФатIимэ, егъэджэныгъэмкIэ управленэм и унафэщI Жэрэщты Олег, щэнхабзэмкIэ къудамэм и лэжьакIуэ Хур Каринэ сымэ.
- Iуэхур къызэрагъэпэщащ Урысей МВД-м и «Аруан» къудамэм Iэпхъуэшапхъуэхэм я IуэхухэмкIэ и IэнатIэм и лэжьакIуэхэм.
- Атэлыкъ ФатIимэрэ Iэпхъуэшапхъуэхэм я IуэхухэмкIэ къудамэм и унафэщI, полицэм и майор КIуэкIуэ ФатIимэрэ гуапэу ехъуэхъуащ паспортыр зрата ныбжьыщIэхэм.
- — Паспортыр щIалэгъуалэм дежкIэ мыхьэнэшхуэ зиIэщ. Фэ нэхъ пэгъунэгъу фохъу фи мурадхэр зэвгъэхъулIэным, сыту жыпIэмэ, паспортым гъуэгур фхузэIуех. Абы къыдэкIуэуи жэуаплыныгъэ къыфхуегъэув, псом япэу къэралым хуэгъэзауэ, — къыхигъэщащ КIуэкIуэ ФатIимэ.
- Район администрацэм и Iэтащхьэм и къуэдзэ Атэлыкъ ФатIимэ жиIащ щIалэгъуалэм къэралым нэхъри зрагъэужьыну, езы ныбжьыщIэхэм заузэщIыну нэхъыжьхэр къазэрыщыгугъыр.
- ЗэIущIэм фIыщIэ щыхуащIащ быныфI зыгъэса адэ-анэхэм.
- КъБР-м щыIэ МВД-м и пресс-IуэхущIапIэ.