ЩIалэгъуалэм йогупсыс
2016-12-20
- Дыгъэгъазэм и 15-м Печатым и Унэм щекIуэкIащ КъБР-м и жылагъуэ зэгухьэныгъэхэм я зэIущIэ. Ар къызэIуихащ КъБР-м Зауэм, Лэжьыгъэм, IэщэкIэ ЗэщIэузэда Къарухэмрэ хабзэхъумэ IуэхущIапIэхэмрэ я ветеранхэм я жылагъуэ зэгухьэныгъэм и унафэщI Шыхъуэбахъуэ Мухьэмэд.
- — Ди цIыхухэм, адэ-анэхэм, егъэджакIуэхэм захуэзгъазэу жысIэну сыхуейт ди быныр терроризмэм щыхъума хъуным ди къару псори етхьэлIэну. ЩIэблэр дэ дымыхъумэмэ, дымыгъасэмэ, дымыунэтIмэ, Iуэху щхьэпэхэм дедмыгъэхьэхмэ, щIэпхъаджащIэу ежьэжынуращ. Дунейм мыхъумыщIагъэ куэд къыщокIуэкI. А псори телевизоркIэ, ИнтернеткIэ ялъагъу. НыбжьыщIэр ягъэжакъуэмэ, къыпхуемыгъэгъэзэжыну и дуней еплъыкIэм, и хьэлым, и щытыкIэм зихъуэжынущ, имыщIапхъэ ищIэным тегушхуэнущ, — жиIащ абы.
- Шыхъуэбахъуэм къыхигъэщащ къэралыр, адэ-анэр, егъэджакIуэхэр зэдэмылажьэмэ, щIэблэр гъуэгу захуэ трамыгъэувэмэ, щIэныгъэрэ IэщIагъэрэ ирамытмэ, ахэр зэрытIэщIэкIынур.
- Мухьэмэд зэIущIэм хэтхэр къыхуриджащ жылагъуэ зэгухьэныгъэхэм яхузэфIэкI ялэжьыну, я Iуэху щхьэпэхэм щIалэгъуалэр хашэну, къэралыр къазэрыхуэныкъуэр абыхэм зрагъэщIэну.
- Фырэ Анфисэ.