КъБР-м и гупыр етIуанэщ
2014-03-04
- Урысейм и Кубокым щыщIэбэна бэнэкIэ хуитымкIэ зэхьэзэхуэ Налшык дэт универсальнэ спорт комплексым махуитIкIэ щекIуэкIащ. Абы бжьыпэр щаубыдащ Дагъыстэным и спортсменхэм, Къэбэрдей-Балъкъэрым и бэнакIуэхэр етIуанэщ.
- Командэ-щхьэзакъуэ зэхьэзэхуэр илъэсым и кIэрщ щрагъэкIуэкI хабзэр. АрщхьэкIэ, къэралым и кубок зэпеуэр щхьэусыгъуэ гуапэкIэ ягъэIэпхъуащ икIи КъБР-м спорт бэнэкIэм и лъабжьэр зыгъэтIылъахэм ящыщ Хъанычэ Мухьэмэд и юбилейм — и ныбжьыр илъэс 70 зэрырикъур щигъэлъапIэм — ирырагъэхьэлIащ.
- Зэхьэзэхуэр къыщызэIуахым япэу псалъэ иратащ Мэзкуу къикIа хьэщIэ лъапIэ УФ-м спорт бэнэкIэмкIэ федерацэм и къэрал тренер Агаев Эрик.
- — Илъэс 12-м къриубыдэу иджы япэу Урысейм и Кубок зэпеуэр Кавказ Ищхъэрэ щIыналъэм, Къэбэрдей-Балъкъэрым и щыхьэрым зэрыщекIуэкIыр икъукIэ гуапэ сщыхъуащ. Дызыпэплъэ текIуэныгъэхэр зыIэрыдгъэхьэну, Урысейм и Кубок зэпеуэм кърихьэлIа судьяхэм я къалэныр захуагъэ хэлъу зэфIахыну сыщогугъ, — жиIащ къэрал тренерым. Урысейм спортымкIэ и министерствэм, БэнэкIэ спорт лIэужьыгъуэхэмкIэ федерацэм къабгъэдэкIыу Хъанычэ Мухьэмэд ар ехъуэхъуащ икIи щIыхь тхылърэ саугъэтрэ иритащ.
- Лэскэн районым щыщ командэхэм зэхьэзэхуэм кърихьэлIа Арщыдан къуажэ администрацэм я лIыкIуэхэм юбилярым псалъэ гуапэхэмкIэ зыхуагъэзащ, фэеплъ саугъэтхэмкIэ егуэпащ. Афганистаным и ветеранхэм я зэгухьэныгъэм Хъанычэ Мухьэмэд иритащ «Советыдзэр Афганистаным къызэрырашыжрэ илъэс 25-рэ ирокъу» юбилей медалыр.
- Илъэс 70-р зыгъэлъапIэм ехъуэхъуащ, бэнэкIэ хуитым республикэм нэхъри зэрызыщиужьынур, спортсменхэм ехъулIэныгъэхэр къазэрыпэплъэр и фIэщ зэрыхъур жиIащ КъБР-м спортымкIэ и министрым и къуэдзэ Мамхэгъ Хьэчим.
- Зэхьэзэхуэм и япэ махуэм ди бэнакIуэхэр Краснодар крайм, Якутием я командэ къыхэхахэм, Урысейм и студент зэгухьэныгъэм и командэм ефIэкIащ.
- КIэух зэIущIэм кърикIуахэмкIэ Урысейм и кубок зэпеуэм Дагъыстэным и командэр щытекIуащ. КъБР-м и командэ къыхэхам етIуанэ увыпIэр къихьащ. Урысейм и студент зэгухьэныгъэм и бэнакIуэхэр ещанэщ.
- Урысейм и Кубок зэпеуэр, мы гъэм и мэкъуауэгъуэм Якутск щекIуэкIыну Урысейм и чемпионатым кIуэну зыхуэфащэр (1, 2-нэ увыпIэхэр) къыщыхах зэхьэзэхуэщ. КъищынэмыщIауэ, япэ увыпIищыр къэзыхьахэмрэ призерхэмрэ бэнэкIэ хуитымкIэ Урысейм спортымкIэ и мастерым и мардэхэр ягъэзэщIащ.
- Щхьэзакъуэ зэпеуэм и спортсменхэм медалитху щызыIэрагъэхьащ. Хъром Атмир дыжьыныр къылъысащ. Машэз Расул, Абэикъуэ Алан, Мер Арсен, Щоджэн Азрэт сымэ жэз медалхэр къахьащ.
- УАРДЭ Жантинэ.
- Сурэтхэр Елъкъэн Артур трихащ.