Тхуэгъэкъаруунум тращIыхь
2014-02-08
- Къэбэрдей-Балъкъэрым и Iэтащхьэм и къалэнхэр пIалъэкIэ зыгъэзащIэ КIуэкIуэ Юрий дыгъуасэ иригъэкIуэкIа зэIущIэм щызэпкърахащ республикэм и ЩIыналъэр зэраубзыхун схемэм и проектымрэ Налшык къалэ округым и Генеральнэ планымрэ ятеухуа Iуэхугъуэхэр.
- — ЩIыналъэхэр фейдэ пылъу зехьэныр, абыхэм зэрызаужь щIыкIэр егупсысауэ зэкIэлъыгъэкIуэныр къытпэщыт къалэн нэхъыщхьэ дыдэхэм ящыщщ. Тхуэгъэкъаруунум тещIыхьауэ социально-экономикэ зыузэщIыныгъэм и стратегиемрэ экономикэм и IэнатIэ щхьэхуэхэм, социальнэ IуэхущIапIэхэм зэрызаужьынум я программэхэмрэ догъэхьэзыр. Абыхэм папщIэ, щIыналъэр зэраубзыхунум и схемэрэ генпланрэ диIэн хуейщ, — къыхигъэщащ КIуэкIуэ Юрий зэхыхьэр къыщызэIуихым.
- Къыхалъхьа Iуэхугъуэхэм ятеухуауэ зэIущIэм къыщыпсэлъащ Налшык къалэ администрацэм и Iэтащхьэм и къуэдзэм и къалэнхэр зыгъэзащIэ, архитектурэмрэ къалэ ухуэныгъэмкIэ департаментым и унафэщI КхъуэIуфэ Иринэ, экономикэ зыужьыныгъэмкIэ министрым и пщэрылъхэр езыхьэкI Мусуков Алий, Налшык къалэ администрацэм хабзэ Iуэхухэр зэхуэгъэкIунымкIэ и къудамэм и унафэщI Тап Руслан, нэгъуэщIхэри.
- ЗэIущIэм хэтащ КъБР-м и Парламентым и Тхьэмадэ Чеченов Ануар, Правительствэм и УнафэщI Храмов Константин, министр щхьэхуэхэр, къалэ, район администрацэхэм я Iэтащхьэхэр.
- Зэхыхьэм теухуа тхыгъэ ди газетым тетынущ.
- Аруан Алий.