2013-12-18
- ЩIалэгъуалэм ядоIэпыкъу
- Старэ Шэрэдж дэс щIалэгъуалэмрэ еджакIуэхэмрэ я жэрдэмкIэ футбол джэгупIэ яухуэнущ. Метр зэбгъузэнатIэ 800-м нэблагъэ губгъуэ IэрыщIыр щаукъуэдиинущ къуажэ дыхьэпIэм.
- ЩIыпIэр езы ныбжьыщIэхэм къыхаха нэужь, IэщIагъэлIхэм Iуэхур нэсу яубзыхуащ. Къуажэдэсхэм абы текIуэдэну мылъкур щIадзауэ зэхуахьэс. Абыхэм ядэIэпыкъуну гупыж ящIащ «Аруангъуэгуухуэ», «Спецасфальтстрой» IуэхущIапIэхэм. Спортым зезыта щIалэгъуалэм закъыщIигъэкъуащ Аруан район администрацэм и Iэтащхьэ Къанокъуэ Антермыкъан.
- Сом мин 400 зытекIуэдэну лъабжьэр ягъэтIылъа нэужь, КъБР-м Спортымрэ туризмэмкIэ и министерствэм и дэIэпыкъуныгъэкIэ губгъуэ IэрыщIыр иралъхьэнущ. Топ джэгупIэм къыбгъурыту щаухуэнущ иджырей мардэхэм тет сабий джэгупIэ.
- Сокъур Риммэ.
- Зэпеуэшхуэхэр къапоплъэ
- СамбэмкIэ Кавказ Ищхъэрэ федеральнэ щIыналъэм пашэныгъэр къыщыхьынымкIэ зэхьэзэхуэрэ чемпионатрэ боевой самбэмкIэ щIыналъэ чемпионат «Налшык» спорт комплексым махуитхукIэ щекIуэкIащ.
- Зэхьэзэхуэр Iуэхугъуэ гуапэкIэ къызэIуахащ. А спорт лIэужьыгъуэм и зыужьыныгъэм хэлъхьэныгъэшхуэ зэрыхуащIам папщIэ, КИФЩI-м СамбэмкIэ и федерацэм и ЩIыхь тхылъхэр иратащ КъБР-м и Парламентым и депутат Щауэ Юрэ, Тэрч район администрацэм и Iэтащхьэ Пэнагуэ Максим, КъБР-м самбэмкIэ и федерацэм и унафэщIхэмрэ тренерхэмрэ.
- 2014 гъэм мазаем и кIэм боевой самбэмкIэ Улан-Удэ щекIуэкIыну урысей чемпионатым хэтынымкIэ хуитыныгъэм щIэбэнащ спортсмени 100. Ди щIалэхэм япэ увыпIэу 3, етIуанэу — 1, ещанэу — 6 зыIэрагъэхьащ. Боевой самбэмкIэ КИФЩI-м и чемпион хъуащ Къуэныкъуей Азэмэт, Багъ Олег, Курбанисмаилов Расим сымэ.
- СамбэмкIэ КИФЩI-м и чемпионатым цIыхухъухэри цIыхубзхэри хэтащ, текIуэныгъэхэр къыщахьащ Къарэмыщ СулътIан, Гъубжокъуэ Iэсхьэд, Гузеевхэ Зурьятрэ Iэминатрэ, Алиевэ Iэсият. Iэрыпщэ Замир, Мусэ Ахьмэд, Кучмезов Муксим, ЩоджэнцIыкIу Еленэ, Щомахуэ Миланэ сымэ ныбжьыщIэхэм я зэпеуэм къыщыхэжаныкIащ.
- Апхуэдэу ехъулIэныгъэхэр зыIэрагъэхьащ Темрокъуэ Азэмэт, Iэрыпщэ Замир, Дрогуэ Елдар, Гъубж Елдар, Къалмыкъ Артур, Тхьэзэплъыж Астемыр, Тэнащ Алим, АфэщIыж Аслъэн, КIэбышэ Астемыр, Бейтыгъуэн Астемыр, Жылау Альберт, Газаев Хъызыр, Точиев Ислъам сымэ.
- Зи цIэ къитIуа псори самбэмкIэ Урысейм пашэныгъэр къыщыхьынымкIэ зэхьэзэхуэ Пермь щекIуэкIынум хэтынущ.
- УЭРДОКЪУЭ Азэмэт.
- Дунейпсо зэхьэзэхуэм макIуэ
- Бабугент щыщ боксер Туменов Биберт 1996 — 1997 гъэхэм къалъхуа боксер ныбжьыщIэхэр къызрихьэлIа урысейпсо зэхьэзэхуэм щытекIуащ. Оренбург къалэм щызэхэта а зэпеуэм Урысей Федерацэм и щIыпIэ 52-м я спортсмен 200-м щIигъу хэтащ.
- «Бастион» клубым и гъэсэн, спортымкIэ мастерхэм я кандидат Туменов Биберт (кг 64-рэ) зэIущIиплI иригъэкIуэкIати, псоми щытекIуащ. КIэух зэIущIэм ди боксерым хьэрхуэрэгъу къыщыхуэхъуа Урысейм и чемпион, Курган областым щыщ Мишечкин Константин щыхигъащIэри, дыщэ медалыр зыIэригъэхьащ.
- Зэхьэзэхуэм кърикIуахэмкIэ Туменов Биберт Урысейм и щIалэгъуалэ командэ къыхэхам хагъэхьащ икIи 2014 гъэм и мазаем ар Дублин ( Ирландием), Анапэ щекIуэкIыну дунейпсо зэпеуэхэм хэтынущ. А зэпеуэхэм къарикIуэхэм елъытауэ яубзыхунущ мэлыжьыхьым и 6 — 14-хэм Болгарием щекIуэкIыну дуней псом пашэныгъэр къыщыхьынымкIэ зэхьэзэхуэм ди къэралым и щIыхьыр щызыхъумэну командэм хыхьэнухэр.
- Кужоновэ Эльмирэ.