ГъащIэр дощIэращIэ
2013-09-17
- Бахъсэн къалэм дэт щIалэгъуалэ центрым иджыблагъэ щагъэлъэпIащ Дахагъэм и дунейпсо махуэр. Хъыджэбзхэм ирагъэлъэгъуащ напэхэмрэ щхьэцымрэ зэрыкIэлъыплъ щIыкIэр, сэхусэплъ екIуу зэрызыхалъхьэнумрэ унэм щIэсу нэкIум зэрелIэлIэфынумрэ и щэхухэми хагъэгъуэзащ.
- «Галактика» ЩIалэгъуалэ центрым узыншагъэр егъэфIэкIуэным хуэунэтIа и къудамэм и унафэщI Гугу Мадинэ зэIущIэм хэтхэм защыхуигъазэм къыхигъэщащ ижь-ижьыж лъандэрэ ди бзылъхугъэхэм нэхърэ нэхъ дахэ щымыIэу къызэрыгъуэгурыкIуэр. Дахагъэр къыбдалъхуауэ пхэлъми, зыкIэлъыплъыжын зэрыхуейр, абы папщIэ уи щIыIалъэм дэлъ пхъэщхьэмыщхьэхэри зэрысэбэпышхуэр яжриIащ. Апхуэдэуи мыхьэнэшхуэ иIэщ зэрызыбгъэпсэхум, уи узыншагъэм зэран хуэхъу хьэл мыхъумыщIэхэр зыхэнын, жьы къабзэм ухэту нэхъыбэрэ къэкIухьын, и зэманым ужеин зэрыхуейм.
- Зэхыхьэм ипкъ иткIэ ирагъэкIуэкIащ «Удахэну фIыщ!» зыфIаща Iуэхури. Уи теплъэр зэребгъэфIэкIуэну, дахагъэм узэрыкIэлъыплъыну щIыкIэхэр зытет тхылъымпIэхэмрэ тхылъ цIыкIухэмрэ уэрамым цIыхухэм щыхуагуэшащ. Бзылъхугъэхэм ящыщ куэдым жаIащ апхуэдэ махуэшхуэ щыIэу зэрамыщIар, дахагъэм хухэха Iуэхухэр зэрагуапэр. Щхьэц щыщIащэ, бзылъхугъэхэм зыщагъэдахэ салон щIагъуэу къуажэм зэрыдэмытыр я жагъуэ зэрыхъур жаIащ дыгулыбгъуейдэсхэм. Апхуэдэ IуэхущIапIэр сэбэпышхуэ хъунут цIыхубзхэр зыкIэлъыплъыжынымкIэ, я гукъыдэжми хуэщхьэпэнущ.
- ЛОКЪУЭ Дисэ.