ФIы щIэи, псым хэдзэ
2013-04-23
- Сирие Хьэрып Республикэм щекIуэкI зауэ-политикэ зэпэщIэувэныгъэхэм зэрыщIидзэрэ щIы хъурейм тес цIыхуфI псори иригузавэу а къэралым къыщыхъухэм кIэлъоплъ. А щIыпIэм ижь-ижьыж лъандэрэ щыпсэу хьэрыпхэм къищынэмыщIа, гугъуехь мыухыжым хэхуащ абы щыхэхэс цIыху минищэм щIигъу адыгэхэри.
- Зауэ зэпэщIэувэныгъэм и япэ махуэхэм щегъэжьауэ, зи Хэку къэзыгъэзэжхэм защIэгъэкъуэнымкIэ, Урысей Федерацэми нэгъуэщI къэралхэми щылажьэ адыгэ жылагъуэ зэгухьэныгъэхэм яхузэфIэкI къагъэнэркъым. Абыхэм я гуащIэ халъхьэкIэрэ, Къэбэрдей-Балъкъэр, Къэрэшей-Шэрджэс, Адыгэ республикэхэм псори зэхэту цIыху миным нэблагъэ къагъэзэжащ.
- АрщхьэкIэ я Хэкужь зи щхьэ къезыхьэлIэжа адыгэхэр къыздэкIуэжам гугъуехь куэдым щыIууащ: зыщIэсын унэкIи, мылъкукIи тэмэму къызэрызэмыгъэпэщам, лэжьэну хуейхэм здыIуувэн IэнатIэ зэрамыгъуэтым, нэгъуэщI-къинэмыщIхэми къахэкIкIэ. КъэIэпхъуэжахэм я нэхъыбэр къуажэхэм мэIэпхъуэ, санаторэхэм къыщIокIыж. Абы къыдэкIуэуи, къэзыгъэзэжахэм икIэщIыпIэкIэ зыдэIэпыкъун хуей унагъуэхэри яхэтщ: адэ-анэм ящыщ зыр зыщхьэщымытыжхэр, сабий цIынэ зэрысхэр, сымаджэ хьэлъэ зезыхьэхэр, нэгъуэщIхэри.
- Ди республикэм щыпсэу цIыхухэр, нобэкIэ яхузэфIэкI къамыгъанэу, щытыкIэ гугъум иува хэкуэгъухэм ядоIэпыкъу. ЕрыскъыхэкIкIэ, щыгъынкIэ зэрызыщIагъакъуэм къищынэмыщIа, къэIэпхъуэжахэм ахъшэкIэ япэIэбэхэри мащIэкъым. ЗэрыгурыIуэгъуэщи, къэзыгъэзэжахэм я дежкIэ псом нэхъапэр гулъытэ къызэрыхуащIыр, къазэрыщыгуфIыкIыр, къазэрыхуэныкъуэр зыхащIэнырщ, утыку къызэрырамынэнури хьэкъыу япхыкIынырщ.
- ЕгъэтIылъэкI жыхуаIэр ямыщIэу, зы махуэ къэмынэу, Сирие къэралым къиIэпхъукIыжа адыгэхэм я Iуэху зэрахуэ ДАХ, КъАХ, «Пэрыт» жылагъуэ зэгухьэныгъэхэм, КъБР-м ЦIыхубэ хъыбарегъащIэ IэнатIэхэмкIэ, жылагъуэ, дин зэгухьэныгъэхэмкIэ и министерствэм хэкуэгъуэхэм ядэлэжьэнымкIэ и къудамэм, нэгъуэщIхэми.
- Налшык къалэ щыIэ зыгъэпсэхупIэхэм щIэс хэкуэгъухэм я унэцIэхэр «Адыгэ псалъэ», «Газета Юга» газетхэм къызэрытрадзэу, Адыгэ жылагъуэ зэгухьэныгъэхэм я ЗэзыгъэуIу советым хэтхэм унафэ къащтащ нэхъ хуэмыщIа унагъуэхэм ахъшэкIэ зыщIагъэкъуэну. Апхуэдэ гукъэкI зыщIахэм ящыщщ Къалмыкъ Жылэбий, Шэшэн МуIэед, Джэрыджэ Хьэсэн, Уэрэзей Суфэдин, ГуэбэщIыкI Владимир, ГуэбэщIыкI Жантемыр, Щэуей Суфэдин, Мысрокъуэ МэчраIил сымэ, нэгъуэщIхэри. ДэIэпыкъуныгъэр зыхуаунэтIахэм ялъэгъэIэсынымкIэ сэбэп хъуащ «Пэрыт» жылагъуэ зэгухьэныгъэм и тхьэмадэ СтIащ Ахьмэд.
- Зи Хэку къихьэжахэм ящыщу цIыху зыбжанэм езым я IэщIагъэм теухуауэ лэжьапIэ къыхуагъуэтащ. АбыкIэ сэбэп хъуахэм зэхэщIыкI лъагэ къызэрагъэлъэгъуамкIэ фIыщIэ яхуэфащэщ.
- Адыгэ жылагъуэ зэгухьэныгъэхэм я ЗэзыгъэуIу советым езым и хэщIапIэм гъатхэпэм и 20-м щызэхуишэсащ КъБР-м щыпсэу лIакъуэ нэхъ ин дыдэхэм я лIыкIуэхэр. Ахэр къэзыгъэзэжахэм ящыщу я унэцIэджэгъухэм ядэIэпыкъуну къыхураджащ.
- Зи гугъу тщIы зэхуэсым къекIуэлIахэщ Къардэнхэ, КIэрэфхэ, ДыщэкIхэ, Токъмакъхэ, Науржанхэ, Бабыгуейхэ, Щауэжьхэ, Хъурзокъуэхэ, Щэ- уейхэ, нэгъуэщI лъэпкъхэми къахэкIа цIыхухэр. Зэхыхьэм кърихьэлIа псоми хамэ къэрал къиIэпхъукIыжа хэкуэгъухэм зыщIагъэкъуэну гукъыдэж зэраIэр къаIуэтащ. КъищынэмыщIауэ, абыхэм къагъэлъэгъуащ Сирием къикIыжахэм ядэIэпыкъун Iуэхур нэхъ щIэгъэхуэбжьа хъун папщIэ, псори щызэрыщIэ телемарафон егъэкIуэкIамэ зэрынэхъыфIыр.
- ЗэзыгъэуIу советым, щытыкIэ гугъум ихуа ди хэкуэгъухэм ядэIэпыкъуным теухуауэ, Къэбэрдейм щыпсэу адрей лIакъуэхэми захуегъазэ икIи псапэрэ фIыгъуэшхуэрэ зыпылъ мы Iуэхугъуэшхуэм щхьэж хузэфIэкI хилъхьэну дэтхэнэ зы адыгэри къыхуреджэ.
- Хэкуэгъухэм зыгуэркIэ ядэIэпыкъуну хуейхэр псалъэ хъунущ мы телефонхэмкIэ:
- Жылагъуэ зэгухьэныгъэхэу: 89034255884 — СтIащ Ахьмэд («Пэрыт»); 8962 6521056 — Къэбардэ Астемыр (Адыгэ жылагъуэ зэгухьэныгъэхэм я ЗэзыгъэуIу совет), 89286916920 — Мыкъуэжь Арсен (Дунейпсо Адыгэ Хасэ); 89286934817 — Щоджэн Iэминат (Къэбэрдей Адыгэ Хасэ).
- Къумахуэ Аслъэн.