ЛIупым и топым текIуэныгъэ къытхуехь
2021-11-23
- «Спартак-Налшык» (Налшык) — «Черноморец» (Новороссийск) — 1:0 (1:0). Налшык. «Спартак» стадион. ЩэкIуэгъуэм и 19-м.
- Судьяхэр: Иванников (Ставрополь), Охрименкэ (Мейкъуапэ), Тюмидов (Элиста)
- «Спартак-Налшык»: Антипов, Дэхъу, Молэмусэ, Сындыку, ЛIуп, Бэчбо, Ольмезов, Черткоев (Белоусов, 77), Хьэшыр, Торосян, Жангуразов (Мэкъуауэ, 73).
- «Черноморец»: Фролкин, Хьэгъур (Абдокъуэ, 63), Кириленкэ, Джамалутдинов, Курбанов, Антонов, Гыстаров (Будагян, 80), Климов, Панамарёв (Крюков, 80), Чалый (Джанелидзе, 66), Матюшенкэ (Белов, 80).
- Топыр дигъэкIащ: ЛIупым, 33 (1:0) пенальтикIэ.
- Дагъуэ къыхуащIащ: Ольмезовым, Дэхъум, Джамалутдиновым, Торосян, Белоусовым, Бэчбо, Джанелидзе.
- Урысей Федерацэм футболымкIэ и етIуанэ дивизионым и Япэ гупым щекIуэкI зэхьэзэхуэм хыхьэу мэрем блэкIам «Спартак-Налшыкым» къригъэблэгъащ Новороссийск и «Черноморец»-р.
- Гъэ джэгугъуэм хыхьэ иужьрей зэIущIэр хьэщIэхэм жыджэру къыщIадзащ. ЕплIанэ дакъикъэр екIуэкIыу ди штрафнойм пэмыжыжьэу Ольмезовым хабзэр къызэпиудащ. Абы къыпэкIуэу «Спартак-Налшыкым» и футболистым судьям дагъуэ къыхуищIащ икIи «Черноморец»-р штрафнойм къеуэну хуит ищIащ. Хэгъэрейхэм ягъэува «блыным» пхрылъэта топым Антиповым къригъэгъэзащ.
- Япэ Iыхьэм щыщу дакъикъэ пщыкIутху дэкIауэщ налшыкдэсхэм я джэгукIэр щызэтрагъэувар. Ди щIалэхэм я ебгъэрыкIуэныгъэм хэту топыр къызыIэрыхьа Черткоевыр штрафнойм щихьэм ар зыIэщIигъэкIащ. КъыкIэлъыкIуэу бжыгъэр къызэIуихыну IэмалыфI дыдэ иIащ Хьэшырым. Гъуащхьэтетым къыпекIуэкIри, ар лъэщу еуат, арщхьэкIэ гъуэм дыхьэ топым хьэщIэхэм я гъуащхьэхъумэхэм ящыщ зым къригъэгъэзащ.
- ЗэIущIэм и Iыхьэ щанэр дэкIауэ «Черноморец»-м къызэригъэпэща контратакэм хэту хьэщIэхэм Антиповым и гъуэм топ дагъэкIащ, арщхьэкIэ ар хабзэм къемызэгъыу дагъэкIауэ къэзылъыта судьям хибжакъым.
- «Спартак-Налшыкыр» нэхъапэми хуэдэу жыджэрт. Ди щIалэхэм я ебгъэрыкIуэныгъэм хэту ипэкIэ кIуатэ Жангуразовым иIыгъ топыр Бэчбом хуигъэжащ. Иужьрейр зыIэщIэкI «Черноморец»-м и гъуащхьэхъумэм хабзэр къызэпиуду фIэкIа ар къыхуэгъэувыIакъым — пенальти. Ар Iэзэу игъэзэщIащ ЛIупым — 1:0.
- Япэ Iыхьэм и кIэухыу гъуащхьэхъумэхэм яIэщIэкIа Сындыкур зэуа топыр гъуэм щхьэпрылъэтащ.
- Загъэпсэхуу къихьэжа нэужь «Спартак-Налшыкым» и ебгъэрыкIуэныгъэхэм пищащ. Штрафнойм щихьэм топыр къызыIэрыхьа Хьэшыр Алан хьэщIэхэм я гъуащхьэхъумэхэм къапекIуэкIри, гъуащхьэтетым хуэзанщIэ хъуащ. Абы щыбгъэдыхьэм ди щIалэр лъэщу топым еуащ, арщхьэкIэ гъуэм щхьэпрылъэтащ. Куэд дэмыкIыу Дэхъум топыр хуигъэжащ штрафнойм ихьэ Черткоевым. Дато ар Бэчбом и лъэныкъуэмкIэ къыхитэжащ, арщхьэкIэ иужьрейр щхьэкIэ зэуа топыр штангэм блэлъэтащ.
- ТекIуэныгъэ къахуэзыхь топ закъуэр щыдагъэкIа зэIущIэм и иужьрей дакъикъэхэр «Спартак-Налшыкым» и тепщэныгъэкIэ иухащ.
- ЕпщыкIубгъуанэ джэгугъуэм и адрей зэIущIэхэм мыпхуэдэ бжыгъэхэр къарикIуащ: «Анжи» (Мэхъэчкъалэ) — СКА (Дон Iус Ростов) — 0:0, «Дружба» (Мейкъуапэ) — «ТIуапсы» (ТIуапсы) — 1:0, «Легион-Динамо» (Мэхъэчкъалэ) — «Биолог-Новокубанск» (Прогресс) — 1:0, «Кубань-Холдинг» (Павловская) — «Динамо» (Мэхъэчкъалэ) — 1:0, «Алания-2» (Владикавказ) — «Ротор-2» (Волгоград) — 2:2, «Чайка» (Песчанокопскэ) — «Динамо» (Ставрополь) — 7:0.
- КъыкIэлъыкIуэ джэгугъуэр «Спартак-Налшыкым» ЕсэнтIыгу щригъэкIуэкIынущ. 2022 гъэм и гъатхэпэм и 7-м ар IущIэнущ абы и «ЕсэнтIыгум».
- ЖЫЛАСЭ Замир.