ХьэщIэхэм я нэгу зеужь
2018-12-18
- Ди республикэм Бахъсэн и псыхъуащхьэхэмкIэ щыIэ Тегенекли щIыпIэм дыгъэгъазэм и 6-м къыщыщIэдзауэ и 10-м нэсыху щекIуэкIащ Урысейм и волонтёр центрхэм я ассоциацэм (ВЦА) хыхьэ волонтёр зэгухьэныгъэхэм я унафэщIхэм я урысейпсо зэхуэс. Абы и лэжьыгъэм хэтащ зи гугъу тщIы къызэгъэпэщыныгъэхэм я лIыкIуэу 160-м нэблагъэ. Ахэр къикIащ УФ-м и щIыналъэ 50-м щIигъум.
- УФ-м и Жылагъуэ палатэм хэт, ВЦА-м и советым и тхьэмадэ Метелёв Артём хьэщIэхэм къабгъэдэкIыу фIыщIэ яхуищIащ Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым и лэжьакIуэхэм я зэхыхьэр щIыпIэ дахэкIейм къызэрыщызэрагъэпэщам папщIэ. Апхуэдэуи абы къыхигъэщащ, Урысейм езыхэм я фIэфIыныгъэкIэ IуэхуфI зылэжьхэм я илъэсым ВЦА-м щригъэкIуэкIа и зэIущIэ нэхъ инхэм мы иджырейр я иужьрейуэ зэрыщытри.
- — Дэ дыхэтащ Мэзкуу къалэ дэт ВДНХ гъэлъэгъуапIэм иджыблагъэ щызэхаша, езыхэм я фIэфIыныгъэкIэ IуэхуфI зылэжьхэм я къэрал зэхуаку форумым, — жиIащ Метелёв Артём. — Абы дэ фIэхъус псалъэкIэ зыкъыщытхуигъэзащ УФ-м и Президент Путин Владимир. Къэралым и УнафэщIым гу зэрылъитамкIэ, илъэсыр и кIэм нэблэгъами, езыхэм я фIэфIыныгъэкIэ нэгъуэщIхэм ядэIэпыкъухэм я Iуэху щхьэпэхэм дяпэкIэ нэхъри зэрызиубгъунум шэч хэлъкъым. Пэж дыдэуи, дэ мыбдежым дыщыхэплъэнущ длэжьахэмрэ дызыхуэкIуэ илъэсым къытпэщылъымрэ.
- Бысымхэм ящыщу зэхуэсым къыщыпсэлъащ КъБКъУ-м и ректор Алътуд Юрийрэ Къэбэрдей-Балъкъэрым егъэджэныгъэмкIэ, щIэныгъэмрэ щIалэгъуалэм я IуэхухэмкIэ и министр Къумыкъу Iэуесрэ. Иужьрейм къызэрыхигъэщамкIэ, Волонтёрхэм я илъэсым фIы и лъэныкъуэкIэ кърикIуахэр ди къэралым и щIыналъэ псоми щызыхащIащ: жылагъуэм къыщыхалъхьэ проект убзыхуахэр нэхъ псынщIэу пхыгъэкIынымкIи, щIалэгъуалэр хэкупсэрэ цIыхугъэ лъагэ яхэлъу гъэсэнымкIи.
- — Апхуэдэу, езыхэм я фIэфIыныгъэкIэ IуэхуфI зылэжьхэм я зэгухьэныгъэхэм хыхьахэм я бжыгъэр илъэс ипэкIэ Къэбэрдей-Балъкъэрым мини 8-м щынэблагъэу щытамэ, мы гъэм и иужьрей мазэм апхуэдэхэр мин 18-м нызэрыхьэсащ. Абыхэм яхэтщ курыт школхэм щеджэхэ-ри, студентхэри, зи ныбжь хэкIуэ-та ди нэхъыжьыфIхэри. Псалъэм къыдэкIуэу къыхэдгъэщынщи, иужьрейхэм зэреджэр «дыжьын волонтёрщ». Мыдрейуэ, ди республикэм щыпсэу щIыдэлъху лъэпкъхэр зэи дыщыщIакъым езыхэм я гукъыдэжкIэ IуэхуфI зылэжьхэм, гуащIэмащIэхэм, зылъэмыкIыжхэм защIэзыгъакъуэхэм. Дызэрыщыгъуазэщи, апхуэдэ Iуэху бгъэдыхьэкIэр и зы джэлэсщ «Адыгэ хабзэ», «Тау адет» зи фIэщыгъэхэу ижькIэрэ къыддекIуэкI дуней еплъыкIэм, цIыху хущытыкIэм, — къыхигъэщхьэхукIащ Къумыкъу Iэуес.
- Тегенекли щIыпIэм щекIуэкIа зэIущIэшхуэм щызэхуэсахэм ящыщу, щIыхь тхылъхэмрэ тыгъэ лъапIэхэмрэ иратащ 2018 гъэм кърикIуахэм япкъ иткIэ къыхэжаныкIа зэгухьэныгъэхэм я лIыкIуэхэм. ИкIи мыбдежым къыщыхэгъэщыпхъэщ ди республикэм щыIэ, езыхэм я фIэфIыныгъэкIэ адрейхэм ядэIэпыкъухэм я «Продвижение» («ЗэдеужьэрэкIыныгъэ») зэщIэхъееныгъэм дэлажьэ «ЩIыналъэ гъэтIылъыныгъэ» зи фIэщыгъэ, Самофаловэ Светланэ зи унафэщI центрыр пажэ хъуахэм зэрахэхуар.
- Форумым щыхэплъащ ВЦА-м 2019 гъэм къыпэщылъхэмрэ дызыхуэкIуэ илъэсым ягъэзэщIэн хуейуэ зыхуагъэувыжахэмрэ. Зэхуэсым хэтахэм къызэрыхагъэщамкIэ, зи гугъу щащIахэр, зыщытепсэлъыхьахэр къахуэщхьэпэнущ я IэнатIэм зыщрихьэлIэ лъэпощхьэпохэр нэхъ тыншу къызэранэкIынымкIи, кърахьэжьэ Iуэхухэр нэхъри нэхъыфIу зрагъэхъулIэнымкIи.
- Ди республикэм щагъэкIуа махуэхэм къриубыдэу, хьэщIэхэр «Азау» хуейм щыIащ, Iуащхьэмахуэ и джабэ нэкIухэм кIапсэ гъуэгухэмкIэ дашащ, а щIыпIэм лыжэкIэ, сноубордкIэ къыщрагъэжыхьащ, Нарзанхэм я фэхум зыщрагъэгъэпсэхуащ.
- КЪУМАХУЭ Аслъэн.