ЛIыхъужьхэр зэи тщыгъупщэнукъым
2018-12-04
- Бахъсэн щIыналъэм щыщу 115-нэ шууей дивизэм хэтахэм я щIыхьыр иджыблагъэ Бахъсэн къалэ щагъэлъэпIащ. 297-нэ Бахъсэн полкым хэтахэм я аллее къыщызэIуахащ къалэм и МафIэ мыужьыхым къедза щIыпIэм. Абы щыхасащ пкIей, кIей жыгыщIэхэр.
- ЗэIущIэм хэтащ Бахъсэн къалэ округым и Iэтащхьэм и къуэдзэ Къардэн ФатIимэ, нэхъыжьыфIхэр, хъыбарегъащIэ IэнатIэхэм я лIыкIуэхэр, къалэм дэт езанэ курыт школым и егъэджакIуэхэмрэ школакIуэхэмрэ.
- 115-нэ шуудзэм хэтахэм зэрахьа лIыгъэм, 297-нэ полкым къигъэлъэгъуа лIыхъужьыгъэм я гугъу ищIащ Къардэн ФатIимэ къыщыпсалъэм. Абы къыхигъэщащ щIалэгъуалэр хэкупсэу къэгъэтэджынымкIэ тхыдэр сэбэпышхуэ зэрыхъур.
- Iуэхум и жэрдэмщIакIуэ, жылагъуэ лэжьакIуэ цIэрыIуэ ЕхъулIэ Къантемыр псалъэ щратым Бахъсэн къалэ округым и щIыналъэ администрацэм и Iэтащхьэ Мамхэгъ Хьэчим фIыщIэ ин хуищIащ и жэрдэмыр къызэрыдиIыгъам папщIэ.
- — Псэемыблэжу зауэм Iута ди щIалэхэм я лIыхъужьыгъэр зыщыдгъэгъупщэнкIэ Iэмал иIэкъым. Мы Iуэхури абыкIэ хуабжьу щхьэпэщ, — жиIащ Бахъсэн къалэ округым и Ветеранхэм я советым и тхьэмадэ Абазэ Хъусен.
- 115-нэ шууей дивизэм хэтахэм ятеухуа усэхэм къеджащ школакIуэ цIыкIухэр. зауэм хэкIуэда сэлэтхэм дакъикъэкIэ яхуэщыгъуэри, фэеплъым удз гъэгъахэр тралъхьащ зэIущIэм и кIэухыу.
- Тэрчокъуэ Дисэ.