2018-12-04
- Тхэквондо
- «Урысей танк цIыкIу»
- Испанием и Валенсие къалэм мы махуэхэм щекIуэкIащ ныбжьыщIэхэм тхэквондомкIэ я европэпсо зэхьэзэхуэ. Абы хэтащ къэрал 47-м я спортсмен нэхъыфIхэр. Урысейм и командэ къыхэхам хэту зэпеуэм зыкъыщагъэлъэгъуащ Къэбэрдей-Балъкъэрым щыщ цIыхуиплIым.
- Зэхьэзэхуэм и япэ махуэм Урысейм и командэ къыхэхам япэ дыщэ медалитIыр къыхуахьащ Багъ Идаррэ Бекъул Миланэрэ. Зы лъэбакъуэкIэ медалхэм нэмысауэ къэувыIэжащ Нэчо Астемыр.
- ЗэIущIэм хухаха зэманыр и кIэм нэмысу, тепщэныгъэ наIуэ зэриIэм къыхэкIыу, япэ зэпэщIэтыныгъэм Идар текIуэныгъэр къыщыхуагъэфэщащ. КъыкIэлъыкIуэри апхуэдэу иухащ. Ещанэм — Тыркум и лIыкIуэр Багъым хигъэщIащ. Финал ныкъуэ зэIущIэм ди лъэпкъэгъум къыщыпэщIэхуа, Италием къикIа тхэквондистым нэхъ гугъу дехьащ, арщхьэкIэ абыи текIуащ. КIэух зэпэщIэтыныгъэм Багъ Идар зы Iэмали иритакъым украин спортсменым.
- «Урысей танк цIыкIу» зыфIаща Бекъул Миланэ иригъэкIуэкIа зэIущIиплIми хухаха зэманыр и кIэм нэмысу текIуэныгъэхэр щызыIэригъэхьащ. Дыщэ медалым хуэзышэ лъагъуэм щрикIуэм абы къызэринэкIащ Тыркум, Ирландием, Израилым, Инджылызым я лIыкIуэхэр.
- Европэпсо зэпеуэм щытекIуахэр ягъэхьэзыращ Ахъмэт Амир, Тикаев Индрис, Кугъуэндокъуэ Елдар сымэ.
- Жыласэ Замир.
- Ашихара-каратэ
- Медаль «уэшх»
- Къэбэрдей-Балъкъэрым СпортымкIэ и министерствэм и унэм пресс-конференц щекIуэкIащ. Абы кърагъэблэгъащ Къэзахъстаным щызэхэта ашихара-каратэмкIэ дунейпсо чемпионатым щытекIуа ди спортсменхэр.
- Урысейм и гуп нэхъыщхьэм хэту Актау къалэм щызэуа КъБР-м и командэ къыхэхам зэфIэкI хъарзынэ къигъэлъэгъуащ — медаль зэмылIэужьыгъуэу 9 зыIэригъэхьащ.
- КъБР-м спортымкIэ и министрым и къуэдзэ Хэжь Заур спортсменхэм ехъуэхъуащ, хуэфэщэну дунейпсо утыкум зыкъызэрыщагъэлъэгъуам папщIэ. АдэкIи я медаль бжыгъэхэм хагъэхъуэну зэригуапэр къыхигъэщащ абы.
- Спортсменхэм журналистхэм хуаIуэтащ зэхьэзэхуэм зэрызыхуагъэхьэзырар икIи гукъинэж нэхъ ящыхъуа IуэхугъуэхэмкIэ ядэгуэшащ. КъыкIэлъыкIуэу зыхэтыну зэпеуэхэм кIэщIу щыгъуазэ ящIри, къызэхуэсахэр ирагъэплъащ дунейпсо чемпионатым ди щIалэхэр зэрыщызэуам теухуа видеороликым.
- Фигу къэдгъэкIыжынщи, махуэ къэс каратэм и лIэужьыгъуэ щхьэхуэхэм- кIэ зэIущIэхэр екIуэкIащ. «Ката» лIэужьыгъуэмкIэ щIалэщIэхэм я деж етIуанэ увыпIэр къыщихьащ ТхьэлI Анзор (кг 70-м нэблагъэ). «Фулл-контакт»-м дыжьын медалхэр щызыIэрагъэхьащ Щоджэн Аслъэнрэ (кг 60-м нэблагъэ) Щоджэн Русланрэ (кг 80-м нэблагъэ).
- «Кумитэ» лIэужьыгъуэм щIалэщIэхэм я деж пашэныгъэр щиубыдащ Бердиев Олег (кг 85-м щIигъу), ТхьэлI Анзор (кг 70) етIуанэ хъуащ. Балигъхэм я зэпэщIэтыныгъэм Щоджэн Русланрэ (кг 80-м нэблагъэ) Мэкъуауэ Аланрэ (кг 90-м щIигъу) дыщэ медалхэр къыщахьащ. Абдул Мунир Ахьмэд (кг 70-м нэблагъэ) етIуанэщ. Жэз медалыр зыIэригъэхьащ Щоджэн Аслъэн (кг 60-м нэблагъэ).
- Спортсменхэр ягъасэ Сэбаншы Муратрэ Щамырзей Щыхьмырзэрэ.
- «Зэхьэзэхуэм и судья нэхъыфI» саугъэтыр къыхуагъэфэщащ ди тренер, ашихара-каратэмкIэ дунейпсо категорие зиIэ судья Щамырзей Щыхьмырзэ.
- МЭЗКУУ Къанщобий.
- БэнэкIэ хуит
- Адыгэ щIалэхэм я хэлъхьэныгъэ
- Раменскэ къалэм дэт «Борисоглебский» спорт уардэунэм бэнэкIэ хуитымкIэ саугъэт нэхъыщхьэм щыщIэбэнащ командибл — Кърымым, Мэзкуу къалэмрэ областымрэ, Курыт федеральнэ щIыналъэм, Красноярск крайм, Шэшэн Республикэм, Урысей студент зэгухьэныгъэм я гуп къыхэхахэр.
- МахуитIкIэ екIуэкIа зэпэщIэтыныгъэхэм япэ гуп увыпIэр щиубыдащ Красноярск крайм и командэ къыхэхам. Мэзкуудэсхэр етIуанэ хъуащ. Къэралым и къалащхьэм и гуп нэхъыщхьэм хэту дыжьын медалхэр зыIэрагъэхьащ ди лъэпкъэгъухэу Бещто Мухьэмэд, ДыщэкI Владислав, Шыбзыхъуэ Марик, Ныр Исмэхьил-Бэч сымэ.
- «Финал цIыкIум» Кърымым и командэм щытекIуащ икIи жэз медалыр зыIэрагъэхьащ Урысей студент зэгухьэныгъэм и бэнакIуэхэм. Абы хэтащ Машэжь Расул, ЗэкIуу зэкъуэшхэр, Iэпщэ Ренат сымэ.
- ЗэкIуу Анзор (кг 70), Шыбзыхъуэ Марик (кг 74-рэ), Iэпщэ Ренат (кг 79-рэ), Ныр Исмэхьил-Бэч (кг 125-рэ) сымэ ирагъэкIуэкIа зэIущIэ псоми щытекIуащ икIи щхьэзакъуэ зэпеуэм пашэныгъэр щаубыдащ.
- ЖЫЛАСЭ Замир.