Iуащхьэмахуэ лъапэ щызэпоуэ
2018-08-07
- Илъэс псом къриубыдэу лажьэ Къэбэрдей-Балъкъэрым щыIэ «Эльбрус» турист-рекреацэ комплексым щекIуэкIащ бгы-лыжэ спортымкIэ урысейпсо зэхьэзэхуэхэр.
- ЦIыхухъухэмрэ цIыхубзхэмрэ зэпеуащ «слалом», «слалом-гигант» лIэужьыгъуэхэмкIэ, къищынэмыщIауэ, щхьэхуэу зэхьэзэхуащ ныбжьыщIэхэри. Псори зэхэту урысейпсо зэпеуэм хэтащ къэралым и щIыналъэ 20-м икIа спортсмени 150-м щIигъу.
- Слалом-гигантым текIуэныгъэр къыщихьащ Подмосковьем щыщ Романовэ Анастасие, цIыхухъухэм я деж пашэ щыхъуащ Сахалин къикIа Другов Юрий. Романовэр, къищынэмыщIауэ, нэхъыфIу къыщыщIэкIащ «слалом» лIэужьыгъуэми. ЦIыхухъухэм я зэхьэзэхуэм нэхъыфIу къыщыщIэкIащ Подмосковьем щыщ Рябицэ Константин.
- Зи ныбжьыр илъэс 14 иримыкъуахэм я деж балл бжыгъэ нэхъыбэ къыщахьащ сахалиндэс Гайдамащук Каринэрэ Красноярск къикIа Бушмин Иванрэ. Илъэс 16-м нэблагъэхэм я зэпеуэм пашэ щыхъуащ Минаевэ Анастасиерэ (Мурманск) Бугаев Кириллрэ (Краснодар край).
- Къэбэрдей-Балъкъэрым и Iэтащхьэм и саугъэтыр къэхьыным теухуауэ екIуэкIа гуп зэхьэзэхуэм текIуэныгъэр къыщихьащ Сахалин областым и командэм.
- Къэралпсо зэхьэзэхуэм кърикIуахэр къызэщIикъуэжу УФ-м бгы-лыжэ спортымрэ сноубордымкIэ и федерацэм и президент Цыганков Валерий къыхигъэщащ зэпеуэхэр фIы дыдэу къызэгъэпэща зэрыхъуар. «Курортым и лэжьакIуэхэм зы Iэмали къагъэнакъым зэхьэзэхуэр сыт и лъэныкъуэкIи дахэу, зэпэщу егъэкIуэкIа зэрыхъунум ехьэлIауэ, — жиIащ Цыганковым. — «Гара-Баши — Мир» станцхэм зэхьэзэхуэшхуэхэр щегъэкIуэкIыным и мардэ псори щыгъэзэщIащ. Спортсменхэр псори арэзы техъуащ».
- Фигу къэдгъэкIыжынщи, «Эльбрус» курортым щекIуэкIа бгы-лыжэ спортымкIэ урысейпсо зэхьэзэхуэр егъэкIуэкIыныр даIыгъащ «Эльбрус курорт» АО-м, «Курорты Северного Кавказа» АО-м, «Эльбрус Адвентур» ООО-м.
- ЩIымахуэ спорт лIэужьыгъуэхэмкIэ зыгъэсэныгъэхэр иджыпсту курортым щрагъэкIуэкI Урысейм и командэ къыхэхахэм.
- Къэхъун Бэч.