Налшык къалэ округым и щIыналъэ администрацэм и Iэтащхьэ Ахъуэхъу Таймураз
2018-06-09
- Налшык къалэ округым щIыпIэ унафэр зегъэкIуэнымкIэ и советым и депутатхэм дыгъуасэ ирагъэкIуэкIа сессием конкурс Iуэхухэм къарикIуахэм щыхэплъэжри, къалэ администрацэм и Iэтащхьэм и къулыкъум ягъэуващ Ахъуэхъу Таймураз.
- Мы къулыкъум увын папщIэ конкурсым хэтащ къалэм дэт еджапIэ №31-м и унафэщI Егъуэж Анзор, республикэ клиникэ сымаджэщым и дохутыр нэхъыщхьэ Мыкъуэ Мурат, федеральнэ налог къулыкъущIапIэм Налшык къалэм дэт и IуэхущIапIэ №2-м и унафэщI Нало Залымджэрий, Къэбэрдей-Балъкъэр къэрал университетым тхыдэмкIэ, филологиемкIэ, цIыхубэ хъыбарегъащIэ IуэхущIапIэхэмкIэ и институтым и унафэщI Тамазэ Муслъим, «Гарант-Сервис УК» жэуап зэхэгъэщхьэхукIа зыхь зэгухьэныгъэм и генеральнэ директор Урысбий Iэюб, къалэ паркым и унафэщIым зэIузэпэщ лэжьыгъэмрэ щIэныгъэмкIэ и къуэдзэ Шымэзокъуэ Мусэ сымэ.
- Къалэм и Iэтащхьэм щIэуэ ягъэувам депутатхэм фIыщIэ яхуищIащ икIи Къэбэрдей-Балъкъэрым зегъэужьыным зэщIыгъуу елэжьыну зэрыщыгугъыр къыхигъэщащ.
- * * *
- Ахъуэхъу Таймураз Борис и къуэр 1971 гъэм Бахъсэн къалэм къыщалъхуащ. Ломоносов М. В. и цIэр зэрихьэу Москва дэт къэрал университетым социологиемкIэ и факультетымрэ Бэрбэч Хь. М. и цIэр зезыхьэ Къэбэрдей-Балъкъэр къэрал университетым и юридическэ факультетымрэ фIы дыдэу къиухащ.
- Абы лэжьэн 1996 гъэм щIидзащ. Федеральнэ хабзэхъумэ, налог органхэм къулыкъу щищIащ. 2015 гъэм и гъатхэпэ мазэм КъБР-м лэжьыгъэмкIэ, цIыхухэр IэнатIэкIэ къызэгъэпэщынымрэ социальнэ дэIэпыкъуныгъэмкIэ и министрым и къуэдзэу ягъэуващ. 2015 гъэм и щэкIуэгъуэ мазэм щегъэжьауэ Федеральнэ казнайчествэм и Управленэу Къэбэрдей-Балъкъэр Республикэм щыIэм и унафэщIу лэжьащ. 2016 гъэм и щэкIуэгъуэ мазэм КъБР-м и Правительствэм и УнафэщIым и къуэдзэу, 2017 гъэм и бадзэуэгъуэ мазэм КъБР-м и Правительствэм и УнафэщIым и япэ къуэдзэу ягъэуващ.
- КъБР-м и Iэтащхьэмрэ Правительствэмрэ
- я пресс-IуэхущIапIэ.