Ахэмын Iэдисэ и зэфIэкI
2013-09-21
- Ипщэ, Кавказ Ищхъэрэ федеральнэ округхэм шашкэхэмкIэ я чемпионат иджыблагъэ Налшык щекIуэкIащ. Абы хэтащ Урысей Федерацэм и щIыналъэхэм, муниципальнэ куейхэм я командэхэр.
- Зэхьэзэхуэм бжьыпэр щиубыдащ КъБР-м и гуп къыхэхам, Тэрч районым икIахэр етIуанэ хъуащ, Налшык къалэм щыщхэм ещанэ увыпIэр къахьащ.
- Зэхьэзэхуэм и къызэгъэпэщакIуэхэм — Ипщэ федеральнэ щIыналъэм ШашкэхэмкIэ и федерацэмрэ Налшык къалэ администрацэм Физкультурэмрэ спортымкIэ и комитетымрэ — джэгу нэхъыщхьэм къыдэкIуэу блиц-зэпеуэхэри ирагъэкIуэкIащ.
- Щхьэзакъуэ зэпеуэм бжьыпэр щиубыдащ Дон Iус Ростов къикIа Александрин Сергей. А зырщ зэхьэзэхуэхэм гроссмейстеру кърихьэлIар. Ди лъахэгъу Гиль Виталий етIуанэ увыпIэр къихьащ. Илъэс 15 зи ныбжь, Тэрч куейм хыхьэ Плановскэ къуажэм щыщ Ахэмын Iэдисэ цIыхухъухэм я зэпеуэм хагъэхьащ икIи Урысей Ипщэм и шашист нэхъыфIхэм ящыщ Гиль Виталий хигъащIэщ, спортым и мастерхэу плIым ятекIуэри, ещанэ увыпIэр къихьащ. Пщащэм пашэныгъэр щызыIэригъэхьащ цIыхубзхэм я зэпеуэми.
- Блиц-зэпеуэм Александрин Сергей щынэхъыфIащ. ЕтIуанэ, ещанэ увыпIэхэр къахьащ прохладнэдэс Гуминюк Григорийрэ (ар ветеранхэм я деж щытекIуащ) Шэджэм щыщ МафIэдз Анатолэрэ.
- Дипломхэр, медалхэр, кубокхэмрэ ахъшэ саугъэтхэмрэ чемпионатым щытекIуахэм иратащ Ипщэ федеральнэ округым ШашкэхэмкIэ и федерацэм и унафэщI, гроссмейстер Александрин Сергей, абы и къуэдзэ, спортым и мастер Балъкъыз Батий, республикэ категорие зиIэ судья, илъэс 40 хъуауэ тренеру лажьэ Гиль Виталий, СССР-м спортымкIэ и мастер Сыжажэ Валерэ сымэ.
- КъыкIэлъыкIуэ зэхьэзэхуэр 2014 гъэм мэкъуауэгъуэм и 17-м Ростов областым и Новочеркасск къалэм щекIуэкIынущ.
- Теркъул Мартин.