Узыншэу псэуным и телъхьэхэр
2013-09-17
- КъБР-м егъэджэныгъэмрэ щIэныгъэмкIэ и министерствэм мы гъэм бадзэуэгъуэм и 9-м къыхилъхьауэ щытащ «Гъэмахуэ узыншэ-2013» Iуэху щхьэпэр. Ар даIыгъащ икIи жыджэру Iуэхум хэтащ министерствэ, ведомствэ, IуэхущIапIэ зэхуэмыдэхэм я лIыкIуэхэр. Сабийхэм зыщагъэпсэхуа санаторэхэм лагерхэм абыхэм къыщызэрагъэпэщащ узыншэу псэуным, мафIэс къэмыгъэхъуным, гъуэгум и хабзэхэм тетыным, хьэл мыхъумыщIэхэр зэрызыхамылъхьэным теухуа зэIущIэхэр.
- Iуэху щхьэпэм кърикIуахэр иджыблагъэ щызэхалъхьэжащ КъБР-м егъэджэныгъэмрэ щIэныгъэмкIэ и министерствэм щIалэгъуалэ политикэмкIэ и департаментым щекIуэкIа зэхыхьэм.
- — «Гъэмахуэ узыншэ-2013» Iуэхум сабий мини 3-м щIигъу къызэщIиубыдащ, — жиIащ КъБР-м егъэджэныгъэмрэ щIэныгъэмкIэ и министерствэм щIалэгъуалэ политикэмкIэ и департаментым и унафэщIым и къуэдзэ Водопьянов Александр. — Ар зэрекIуэкIа мазитIым къриубыдэу сабийхэм зыщагъэпсэхуа, я узыншагъэр щрагъэфIэкIуэжа IуэхущIапIэу 19-м мызэ-мытIэу щыIащ министерствэ, ведомствэ щхьэхуэхэм я лIыкIуэхэр. Абыхэм ныбжьыщIэхэм псалъэмакъ гъэщIэгъуэнхэр драгъэкIуэкIащ, Iуэхугъуэ зэхуэмыдэхэм теухуа зэпеуэхэр къызэрагъэпэщащ. Апхуэдэу наркотикым, фадэм, тутыным къашэ зэраныгъэм теухуауэ дерс къызыхахын хъыбархэм щIагъэдэIуащ. НыбжьыщIэхэр гъащIэ узыншэм къыхуеджэным, ахэр гъуэгу захуэ тешэным ехьэлIауэ къызэдгъэпэща Iуэхур къыддэзыIыгъахэм фIыщIэ яхудощI икIи дащогугъ дяпэкIэ абы и лъэныкъуэкIэ сыткIи дэIэпыкъуэгъу къытхуэхъуну.
- Нобэ сабийм хуащI гулъытэм абыхэм я къэкIуэнур зэрыхъунур куэдкIэ зэрелъытар, абыхэм сытым дежи лъагъуныгъэр зыхегъэщIэн зэрыхуейр къыхагъэщу, Iуэху щхьэпэр адэкIи ефIэкIуэным теухуа я Iуэху еплъыкIэхэр къагъэлъагъуэу зэIущIэм къыщыпсэлъащ КъБР-м и муслъымэнхэм я IуэхущIапIэм и унафэщIым и къуэдзэ Сыжажэ Алим, дохутыр-нарколог ПащIэ Артур, «Жор плъыжь» щIыналъэ къудамэм и лIыкIуэ Къумыкъу Еленэ сымэ.
- ЗэIущIэм и кIэм «Гъэмахуэ узыншэ-2013» Iуэхум жыджэру хэтахэр ягъэпэжащ. Апхуэдэу Къэрал кIуэцI IуэхухэмкIэ министерствэу КъБР-м щыIэм, абы и къудамэхэу УГИБДД-м, ПДН-м, МафIэс шынагъуэншагъэмкIэ къэрал IуэхущIапIэм, Наркотикхэр зэрызэрагъакIуэм кIэлъыплъынымкIэ федеральнэ къулыкъущIапIэм и къудамэу республикэм щыIэм, Налшык къалэ администрацэм егъэджэныгъэмкIэ и департаментым сабий, ныбжьыщIэ творчествэмкIэ и центрым, КъБР-м и муслъымэнхэм я IуэхущIапIэм, «Жор плъыжь» щIыналъэ къудамэм, ЩIалэгъуалэ центрым я лIыкIуэхэм фIыщIэ тхылъхэмрэ саугъэтхэмрэ иратащ.
- ЩхьэщэмыщI Изэ.
- Сурэтыр МАМИЙ Руслан трихащ.