Урысейпсо театр марафоным и дамыгъэр зэIэпах
2019-10-10
- Музыкэ театрым щекIуэкIащ Урысейпсо театр марафоным и дамыгъэр зэIэпыхыным теухуа гуфIэгъуэ зэхыхьэр.
- IуэхущIапIэм и пэIущIэ пэшым къыщызэрагъэпэщащ театр гъэлъэгъуэныгъэ щIэщыгъуэ. Дэтхэнэ зы гупми къыбгъэдэкIыу утыку кърахьащ фэилъхьэгъуэхэр, дамыгъэ лъапIэхэр, хъыбарегъащIэхэр, нэгъуэщIхэри. Театрым и илъэсым хыхьэу, Къэрэшей-Шэрджэс Республикэм Драмэмрэ гушыIэмкIэ и урыс театрым зэхыхьэ гуапэм кърихьэлIахэм я пащхьэм щигъэлъэгъуащ Горький Максим и «Васса Железнова» тхыгъэм къытращIыкIа трагедиер. Театрым и унафэщIыр Урысей Федерацэм и цIыхубэ артист Биджиев Хьэсэнщ.
- Урысейпсо театр марафоным и дамыгъэр зэIэпыхыным теухуа зэхыхьэр Налшык и ужькIэ Ставрополь щрагъэкIуэкIынущ. Музыкэ театрым и артистхэм абы щагъэлъэгъуэнущ Гъуэт Аслъэн и макъамэр зыщIэлъ «Гимн восходящему солнцу» иджырей балетыр, Филатов Леонид и «Про Федота-стрельца, удалого молодца» макъамэ теплъэгъуэр, Гаджибеков Узеир и «Аршин мал алан» опереттэр.
- БЖЬЫХЬЭЛI Розэ.