Жэгъуп ФатIимэ Севастополь къалэм псым щитхьэлащ
2019-08-08
- ШыщхьэуIум и 4-м Севастополь къалэм хъыбар гуауэ къикIащ – абы псым щитхьэлащ дуней псом кикбоксингымкIэ и чемпионкэ, Къэбэрдей-Балъкъэрым щыщ Жэгъуп ФатIимэ. Абы илъэсищ зи ныбжь къуэ цIыкIу къыщIэнащ.
- Жэгъупыр къыщалъхуар Шэджэм щIыналъэм хыхьэ Щхьэлыкъуэ къуажэрщ. Къэралым и щIыхьыр дунейпсо утыкушхуэхэм щиIэту ФатIимэ илъэсиблкIэ хэтащ Урысейм и командэ къыхэхам. Дунейпсо кубокыр мызэ-мытIэу къэзыхьа, кикбоксингымкIэ, тай боксымкIэ спортым и мастер ФатIимэ ехъулIэныгъэшхуэхэр зыIэрыгъэхьэным мыхьэнэшхуэ зэриIэр къилъытэрт, ауэ псом япэ иригъэщыр цIыхугъэрт, ныбжьэгъугъэр гъэпэжынырт.
- — Школым зэрыщIэс лъандэрэ сцIыхурт ФатIимэ, — жеIэ Щхьэлыкъуэ къуажэ администрацэм и Iэтащхьэ Къуныжь Хьэчим. — Спортым щIэх къыхэкIыжын мурад иIэтэкъым абы. «Сэ схузэфIэкIыну псоми сынэсакъым», пыгуфIыкIырт адыгэ бзылъхугъэр.
- Я къуажэгъум и кIуэдыкIар гущIыхьэ ящыхъуащ щхьэлыкъуэдэсхэм. Псоми къыхагъэщ цIыхум дэIэпыкъуныр, гузэвэгъуэ хэхуам зыщIэгъэкъуэныр абы и хьэл-щэным щынэхъыщхьэу зэрыщытар.
- Гузэвэгъуэр къыщыхъуар «Ипщэ» яхт-клубым дежщ. Абдежым къегъэлакIуэхэр щылажьэркъым, зыщыбгъэпскIынуи ухуиткъым. Севастополь зыщызыгъасэу щыIа гупым я къалэнхэр зэфIагъэкIыу хуит хъуа нэужь, дунейпсо чемпионатым и дыжьын медалыр къэзыхьа Гисмеевэ Элинэрэ и ныбжьэгъу Жэгъуп ФатIимэрэ тенджызым зыхадзэну кIуащ. Элинэ Мурманск къалэм щыщт, хы Iуфэм къыщыхъуати, япэ псым хэлъащ. Ар къыщыхэмысыкIыжым, ФатIимэ и ныбжьэгъур къригъэлыну тенджызым зыхидзащ. АрщхьэкIэ тенджыз къэукъубеям езыри къыхэкIыжыфакъым.
- СОКОРЕВЭ Евгение.
- «Комсомольская правда»