Джатэжьей Анзор япэ йощ
2019-05-28
- «Си бзэ — си псэ, си дуней» республикэпсо-фестиваль зэпеуэм и зы Iыхьэу 8-11-нэ классым щIэс еджакIуэхэр я къэхутэныгъэ лэжьыгъэхэмкIэ иджыблагъэ зэхьэзэхуащ. Ар щызэхэтащ Налшык къалэ дэт, ЩIалэгъуалэмрэ сабийхэмрэ я творчествэмкIэ республикэ уардэунэм.
- Зэпеуэм и япэ Iыхьэм къэпщытакIуэхэр щыхэплъэщ абы къагъэхьа лэжьыгъэхэм икIи нэхъыфIу къалъытахэр къыкIэлъыкIуэ Iыхьэм хэтыну хуит ящIащ.
- Зи лэжьыгъэхэр етIуанэ Iыхьэм нэса къэхутакIуэ ныбжьыщIэхэм къапэщытт я лэжьыгъэхэм къэпщытакIуэхэм я пащхьэ щытепсэлъыхьыну. Жюрим хэсхэр кIэлъыплъырт еджакIуэр зэрыпсалъэ бзэм и къабзагъым, лэжьыгъэр нэсу къызэпкърихын папщIэ еджакIуэм къигъэсэбэп Iэмалхэм, и утыку итыкIэм, зыIыгъыкIэм.
- Гулъытэ хэха зыхуэфащэ лэжьыгъэ купщIафIэ куэд утыку кърахьат еджакIуэхэм. Хэти къихутат зыдэс жылэм и щIыпIэцIэхэмрэ абыхэм я хъыбархэмрэ, хэти къызыхэкIа лъэпкъым и лIакъуэ жы- гыр зэфIигъэувэну яужь итат, хэти ди адыгэ тхакIуэхэм я IэдакъэщIэкI зыбжанэ зэпкърихат. Дэтхэнэ лэжьыгъэри къэIуэта зэрыхъум теухуауэ хьэлэмэтт икIи щIэщыгъуэт. Лэжьыгъэхэр щагъэхьэзырым дэIэпыкъуэгъу къахуэхъуа егъэджакIуэхэми Iэмал иратащ я гъэсэнхэм я утыку итыкIэм кIэлъыплъыну.
- Зэпеуэм и кIэм еджакIуэхэм хуагъэува баллхэр зэхалъхьэжа нэужь, япэ увыпIэр хуагъэфэщащ Инарыкъуей къуажэм дэт куырыт еджапIэм и 8-нэ классым щIэс Джатэжьей Анзор. ЕтIуанэ увыпIэр зэдагуэшащ Хьэжнэгъуей Азрэтрэ (Къулъкъужын Ищхъэрэ къуажэм дэт 1-нэ курыт школ, 8-нэ класс) Багъ Даринэрэ (Каменномост къуажэ дэт 1-нэ курыт школ, 10-нэ класс). Ещанэ хъуахэщ Сыжажэ Каринэ (Псыхъурей дэт курыт еджапIэ, 10-нэ класс), ЛъэнкIэпIашэ Алинэ (Малкэ дэт 3-нэ курыт школ, 11-нэ класс), Къардэн Дианэ (Шэджэм ЕтIуанэ дэт 3-нэ курыт еджапIэ, 10-нэ класс) сымэ.
- Апхуэдэу ЛъэнкIэпIашэ Эллинэ (Дзэлыкъуэкъуажэ дэт 1-нэ курыт еджапIэ, 9-нэ класс), ТхьэкIумащIэ Салимэ (Арыкъ къуажэм дэт курыт еджапIэ, 8-нэ класс), Шыбзыхъуэ Алинэ (Нарткъалэ дэт 3-нэ курыт еджапIэ, 8-нэ класс), Алэкъей Залым (Шэджэм ЕтIуанэ дэт курыт еджапIэ, 10-нэ класс), АфIэунэ Миланэ (Дзэлыкъуэкъуажэ дэт 1-нэ курыт еджапIэ, 11-нэ класс) сымэ я лэжьыгъэхэр нэхъыфIхэм ящыщу къалъытащ.
- ХЬЭРЭДУРЭ Аллэ.