Анэдэлъхубзэр зыгъэбзэрабзэхэр
2017-10-11
- Урысейм и онлайн-сату щIыпIэхэм иджыблагъэ къыщIалъхьащ адыгэ джэгукIэхэр зэрыт сабий тхылъхэр. АдыгэбзэкIэ ахэр къыдэгъэкIынымкIэ жэрдэмыр зейр Москва щыпсэу Урыс Аминэщ.
- — Си сабийхэм анэдэлъхубзэр ящIэну си нэ къикIырт. Унэм щIэсхэр адыгэбзэкIэт абыхэм нэхъыбэу дызэрепсалъэр, арщхьэкIэ зи лъахэм пэIэщIэу къэхъу сабийхэмкIэ ари сфIэмащIэ хъужащ. ИтIанэ гу лъыстащ ди бзэмкIэ сабий джэгукIэ цIыкIухэр иту зы тхылъ ди сату щIыпIэхэм зэрыщIэмылъым. Абдеж къыщыушащ мыпхуэдэ гупсысэри, — жеIэ Аминэ.
- ИлъэситI и пэкIэ езымрэ и щхьэгъусэ КIурашын Муратрэ къыдагъэкIащ Джэрыджэ Арсен итха «Ажэжьым и жьакIэр» тхылъыр икIи ар псынщIэ дыдэу зэбгрыкIащ. ИужькIэ мыбыхэм гу лъатащ нэгъуэщI къэралыгъуэхэм ар къазэрыхуэсэбэпынум. Абы теухуауэ тхылъым «мобильнэ гуэдзэн» хуащIащ.
- «Пазл» мардэм тету ягъэхьэзыра иджырей джэгукIэхэр Iыхьищу гуэшащ: унэ псэущхьэхэр, хьэкIэ- кхъуэкIэхэр, къуалэбзухэр. Сабийр зыхуей сурэтыр абыхэм къахиха нэужь, ар япэщIыкIэ Iыхьэ куэду зэбгролъэлъ. Ар IэпэкIэ зырызыххэу экраным щызэхуихьэсыжа нэужь а псэущхьэм е къуалэбзум и цIэр адыгэбзэкIэ къыжреIэ.
- «Мобильнэ гуэдзэныр» гъэхьэзырынымкIэ Аминэ къыдэIэпыкъуащ компьютер хуэIухуэщIэм фIыуэ хэзыщIыкI IэщIагъэлIхэу Iэпщэ Анзоррэ Шыбзыхъуэ Астемыррэ. Лэжьыгъэм къыщагъэсэбэпащ «Хатти» ансамблым и макъамэхэр. Тхылъым ихуащ Джэрыджэ Арсен и усэ цIыкIухэр. СурэткIэ къыдэкIыгъуэр зыгъэщIэрэщIар Хъалил Миланэщ.
- Шэрэдж Дисэ.