Сыт псалъэмакъым къигъэлъэгъуар?
2016-10-26
- Ди къэралым и щыхьэр Москва иджыблагъэ щызэхэтащ УФ-м хыхьэ щIыналъэхэм я курыт школхэм ГИА-р 2016 гъэм зэрыщекIуэкIа щIыкIэм щыхэплъэж, апхуэдэ къэпщытэныгъэхэр дызыхуэкIуэ илъэсым къызэрызэгъэпэщыпхъэм ятеухуа зэхуэс ин. Абы хэтащ ди республикэм и лIыкIуэхэри.
- КъБР-м и Правительствэм и УнафэщIым и къуэдзэ — КъБР-м егъэджэныгъэмкIэ, щIэныгъэмрэ щIалэгъуалэм я IуэхухэмкIэ и министр Емуз Нинэ къызэхуэсахэм я пащхьэ доклад купщIафIэ щищIащ. Ар зэпкърыхауэ тепсэлъыхьащ ди щIыналъэм и курыт школхэм гъэ еджэгъуэ блэкIам и кIэухым ГИА-р (къэрал къызэрыщIагъэкI къэпщытэныгъэ) зэрыщекIуэкIам, абы кърикIуахэм. Апхуэдэу къигъэнэIуащ ГИА-2017-м зэрызыхуэгъахьэзырымрэ абы и къызэгъэпэщыкIэ хъунумрэ. Псалъэмакъым къызэрыхэщамкIэ, къэрал къэпщытэныгъэхэр ди республикэм къызыхуэтыншэу щызэфIахащ, ныкъусаныгъэшхуэхэр хэмылъу.
- ЗэIущIэр иригъэкIуэкIащ УФ-м Егъэджэныгъэмрэ щIэныгъэмрэ я IэнатIэм кIэлъыплъынымкIэ и федеральнэ къулыкъущIапIэм и унафэщI Кравцов Сергей. Абы хэтащ а IэнатIэм и IэщIагъэлIхэр, ТестхэмкIэ федеральнэ центрым (ФЦТ), Педагогикэ къэхутэныгъэхэмкIэ федеральнэ институтым (ФИПИ), «Ростелеком»-м, СвязымкIэ къэралпсо IуэхущIапIэм я лIыкIуэхэр, УФ-м хыхьэ щIыналъэхэм егъэджэныгъэмрэ щIэныгъэмкIэ я министрхэр, Зыуэ щыт къэрал экзаменыр (ЕГЭ), Къэрал къызэрыщIагъэкI къэпщытэныгъэр (ГИА) егъэкIуэкIынымкIэ жэуап зыхь IэщIагъэлIхэр.
- ЖЫЛАСЭ Маритэ.