Дэцырхъуей Рузанэ и лэжьыгъэхэр
2022-11-02
- СурэтыщI гъуазджэхэмкIэ музейм, Ткаченкэ Андрей и цIэр зезыхьэм, щагъэлъагъуэ художник Дэцырхъуей Рузанэ и лэжьыгъэхэр щызэхуэхьэса «Линия света» выставкэр.
- Абы лэжьыгъэ 70 хагъэхьащи, дэтхэнэри нэр зыгъэгуфIэщ, гъэщIэгъуэнщ, узыгъэгупсысэщ. Пасэрей статуехэр, щIыуэпс къулейр, натюрмортхэр, кIыфIым тридзэ нэху щхъуэкIэплъыкIэхэр… Гъэлъэгъуэныгъэм щыболъагъу Музыкэ, Урыс театрхэм я спектакль зыбжанэм хэта артистхэм Рузанэ яхуищIа фэилъхьэгъуэхэм я эскизхэри.
- Музейм и унафэщI Ремхен Еленэ выставкэр къыщызэIуихым къыхигъэщащ Дэцырхъуейм и Iэдакъэ къыщIэкIахэр я IуэхущIапIэм етIуанэу зэрыщагъэлъагъуэр, нэхъапэми и сурэтхэр телъыджэ зэращыхъуар.
- — Дунейм и дахагъэр зылъагъу икIи зыхэзыщIэ, иужькIэ ар зи лэжьыгъэхэм хэзыухуанэ цIыхущ Рузанэ, — жиIащ КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ. – Апхуэдэ выставкэ куэдкIэ иджыри дигъэгуфIэну дыхуохъуапсэ сурэтыщIым.
- — Графитаж жанрым зэрымыщIэкIэ сыхуэкIуащ. Кистхэм я пIэкIэ ручкэхэр, тхылъымпIэ пхъашэхэр, лезвэхэр къызогъэсэбэп, — жеIэ зи лэжьыгъэхэр нэгъуэщIхэм ейхэм яхэмыгъуащэ Рузанэ. – Сурэт щIыным и Iэмал зэмылIэужьыгъуэхэм си зэфIэкI сыщеплъыжыну, зэпымыууэ щIэ гуэрхэр си лэжьыгъэхэм хэслъхьэну сфIэфIщ.
- УФ-ми КъБР-ми я цIыхубэ сурэтыщI, ХудожествэхэмкIэ Урысей Академием и академик, профессор Пащты Герман жиIащ Iуащхьэмахуэ лъапэ студентхэм щащыдэлажьэм Дэцырхъуей Рузанэ къицIыхуауэ зэрыщытар, и сурэтхэм бгъэдыхьэкIэ зэмылIэужьыгъуэхэр къызэрыщигъэсэбэпыр пэжу къызэрилъытэр.
- — Рузанэ зэфIэкI зиIэ, нэхугъэрэ лъагъуныгъэкIэ гъэнщIа, гъуазджэм и цIыху нэсщ. Театрым и лэжьакIуэ псоми фIыуэ къалъагъу ар. Зыми емыщхь сурэтыщIым и лэжьыгъэхэм дяпэкIи гулъытэ ягъуэтыну си гуапэщ, – жиIащ Щэнхабзэм и лэжьакIуэхэм я профсоюзым и республикэ къудамэм и унафэщI Дау Марианнэ.
- Дэцырхъуей Рузанэ жиIащ художникхэр кIыхьу зэрымыпсалъэр икIи кърихьэлIахэм езыр-езыру и лэжьыгъэхэм уасэ хуащIмэ нэхъ зэрыфIэфIыр къыхигъэщащ, апхуэдэуи фIыщIэ яхуищIащ гъэлъэгъуэныгъэм зыкърезыгъэхьэлIахэмрэ псалъэ гуапэхэр къыхужызыIахэмрэ.
- Театрым сыт хуэдэ жанрым щыщ роли зыхуэгъэзащIэ артистхэр зэриIэм хуэдэу, Рузани сурэт щIыным и Iэмал псоми зэрыхэзагъэр къыхагъэщащ къэпсэлъахэм.
- Дэцырхъуей Рузанэ Косыгиным и цIэр зэрихьэу Москва дэт текстильнэ академием прикладной гъуазджэмкIэ и факультетыр 1998 гъэм къиуха нэужь, Налшык къигъэзэжауэ КъБР-м и Музыкэ театрым художник-постановщикыу икIи артистхэм я фэилъхьэгъуэхэр зыщI сурэтыщIу щолажьэ.
- Выставкэм еплъынухэм иджыри Iэмал фиIэщ — ар щэкIуэгъуэм и 6 пщIондэ лэжьэнущ.
- ТЕКIУЖЬ Заретэ.
- Сурэтхэр КЪАРЕЙ Элинэ трихащ.