Театрхэмрэ театреплъхэмрэ
2020-10-22
- ГъащIэм и лъэныкъуэ псоми хуэдэу, пандемием республикэм и театрхэм я гъэлъэгъуэныгъэхэми зэхъуэкIыныгъэхэр хилъхьащ – утыкур зыгъэбжьыфIэ артистхэмрэ театреплъхэмрэ мазэ бжыгъэкIэ зэпэIэщIэу щытащ.
- Зэраубзыхуам тету, иджырей зи чэзу театр лъэхъэнэм театреплъхэр зэрыхъукIэ нэхъ мащIэу зэрырагъэблагъэр ди нэгу щIокI. Спектаклхэм зыкърезыгъэхьэлIахэр залым щIыхьэн ипэ къихуэу, я телефонхэр ягъэункIыфIын зэрыхуейм щIыгъуу, зэпымыууэ ягу къагъэкIыж нэкIуIупхъуэхэр зыIуалъхьэну, я Iэхэр ятхьэщIыну. Роспотребнадзорым къызэригъэувым тету, псоми захъумэжыну къыхураджэ.
- Горький Максим и цIэр зезыхьэ Урыс къэрал драмэ театрым мазэм къриубыдэу щагъэлъэгъуэну спектаклхэм я афишэхэр къыфIадзэркъым, сыту жыпIэмэ ахэр зы тхьэмахуэкIэ ипэ итущ зэраубзыхур икIи эпидемием и зэранкIэ къамыгъэлъэгъуэхэнкIэ зэрыхъур къалъытэ. IуэхущIапIэм зи чэзу театр лъэхъэнэр жэпуэгъуэм и 2-м къызэIуихащ Птушкинэ Надеждэ и «Рождественский роман» комедиемкIэ. Жэпуэгъуэм и 12-м утыку кърахьащ «Любовь по-французски» спектаклыр.
- — Пандемием кърикIуа хабзэм тету, театреплъхэр шахмат щытыкIэм тету дгъэтIысыну ди къалэнщ, арщхьэкIэ тIысыпIэу цIыху 800 зиIэ залым апхуэдиз къызэремыкIуалIэм къыхэкIыу, ахэр езыр-езыру зэпэIэщIэу мэтIысхэр, — жаIэ театрым и лэжьакIуэхэм. – Театреплъхэм вирусым зыщахъумэу къыщIэкIынущ. Къалэм и зыгъэпсэхупIэхэм щыIэхэр гупышхуэу щIэх-щIэхыурэ ди хьэщIэщ е санаторэхэм дыкIуэурэ спектаклхэр щыдогъэлъагъуэ. Ди лэжьыгъэхэр нэгъуэщI щIыпIэхэм тшэн и лъэныкъуэкIэ къызыхуэтыншэу дыкъызэгъэпэщащ, декорацэхэри диIэщ. Пандемием ипэкIэ тхьэмахуэм и кIуэцIкIэ лэжьыгъитху утыку къитхьэрт, иджыпсту къытпэплъэр зэкIэ тщIэркъым.
- ЩоджэнцIыкIу Алий и цIэр зезыхьэ Къэбэрдей къэрал драмэ театрым и артистхэм зэпымыууэ спектаклхэр (адыгэбзэкIи урысыбзэкIи) къагъэлъагъуэ. Жэпуэгъуэ мазэр иухыху адыгэбзэщ къызэратынур, щекIуэкIкIэ урысыбзэкIэ зрадзэкIыу. Жэпуэгъуэм и 14-м «А при чём здесь Хапап?», жэпуэгъуэм и 16-м «Как мой дедушка женился» лэжьыгъэхэр ягъэлъэгъуащ.
- Кулиев Къайсын и цIэр зезыхьэ Балъкъэр къэрал драмэ театрым и зи чэзу театр лъэхъэнэр жэпуэгъуэм и 3-м къызэIуихащ «Африканец» спектаклым и япэ гъэлъэгъуэныгъэмкIэ. Жэпуэгъуэм и 12-м абы къыкIэлъыкIуащ «Жених» комедиер. ЩэкIуэгъуэ мазэм ягъэлъэгъуэну спектаклхэр иджыри хэIущIыIу ящIакъым.
- ТЕКIУЖЬ Заретэ.