«Фыкъызэрыддэлажьэм папщIэ фIыщIэ фхудощI»
2019-10-12
- КъБР-м ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министерствэм иджыблагъэ щагъэлъэпIащ хъыбарегъащIэ IуэхущIапIэхэм я лэжьакIуэхэр.
-
ТекIуахэр министр Къумыкъу Iэуес егъэлъапIэ.
- ЗэIущIэр къыщызэIуихым цIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ министр Къумыкъу Iэуес журналистхэм ехъуэхъуащ адэкIи ефIэкIуэну, заузэщIыну, я мурадхэр къайхъулIэну.
- — ХъыбарегъащIэ IэнатIэм пэрытхэми абыхэм я лэжьыгъэми нобэ ди гъащIэм мыхьэнэшхуэ щаубыд хъуащ къэралым зиужьынымкIэ, жылагъуэ гъащIэр ефIэкIуэнымкIэ. Дэ фIыщIэ фхудощI фыкъызэрыддэлажьэм папщIэ. Фи фIыгъэкIэ министерствэм и IуэхущIафэхэм щыгъуазэ мэхъу республикэм ис цIыхухэр, — къыхигъэщащ абы.
- Я къару емыблэжу зэрадэлажьэм папщIэ фIыщIэ тхылъхэр хуагъэфэщащ «Адыгэ псалъэ», «Заман», «Советская молодежь», «Горянка», «Кабардино-Балкарская правда» газетхэм, «Россия 1» ГТРК-м, «1КБР» телевиденэхэм я лэжьакIуэхэм. Апхуэдэу ягъэлъэпIащ щIыналъэхэм щIэныгъэмкIэ я управленэхэм я лIыкIуэхэри.
- КУРПЫГЪУСинэ.